БОУАӨ-ИЙН САЙД Б.БАТБААТАР БҮГД НАЙРАМДАХ УНГАР УЛСААС МОНГОЛ УЛСАД СУУГАА ОНЦ БӨГӨӨД БҮРЭН ЭРХТ ЭЛЧИН САЙД ДР. БОРБАЛА ОБРУЩАНСКИГ ХҮЛЭЭН АВЧ УУЛЗАВ

БОУАӨ-ийн сайд Б.Батбаатар Бүгд Найрамдах Унгар Улсаас Монгол Улсад суугаа Онц бөгөөд Бүрэн эрхт Элчин сайд Др.Борбала Обрущанскиг хүлээн авч, хоёр орны байгаль орчин, уур амьсгалын өөрчлөлтийн салбарын хамтын ажиллагааг дүгнэн хэлэлцэж, цаашдын чиглэлүүд дээр харилцан санал солилцов.

Сайд Б.Батбаатар Унгар Улсаас Монгол орны усны нөөцийн судалгаанд оруулсан хувь нэмэр, зэрлэг байгаль, агнуур, ургамлын менежментийн чиглэлээр хамтран ажиллаж ирсэнд талархал илэрхийлэн, Монгол Улсын Засгийн газраас авч хэрэгжүүлж буй арга хэмжээ, ойрын үеийн төлөвлөгөөг танилцуулав.

Талууд дараах чиглэлээр хамтын ажиллагааг өргөжүүлэхээр санал нэгдэв:

Усны менежментийн шилдэг туршлагыг нэвтрүүлэх: хот суурин газрын үерийн хамгаалалт, эрсдэлийн төлөвлөлт, бохирдлын бууруулалт, цэвэрлэх байгууламжийн шийдлүүдийг Монголд нутагшуулах боломжийг хамтран судлах.

Хоёр орны усны байгууллагууд хоорондын шууд түншлэлийг дэмжиж, хамтарсан төсөл хэрэгжүүлэх, инженер, судлаачдын сургалт, солилцооны хөтөлбөр хэрэгжүүлэх.

Органик хог хаягдлын менежментийн чиглэлээр Унгарын туршлагыг судлах, жишиг төсөл хэрэгжүүлэх боломжийг эрэлхийлэх

Байгаль орчны салбарын хүний нөөцийг мэргэшүүлэх, чадавх бэхжүүлэх арга хэмжээнд хамруулах

Монгол Улсын 2026 онд хүлээн авах НҮБ-ын Цөлжилттэй тэмцэх конвенцын (UNCCD) Талуудын 17 дугаар бага хурал (COP17)-ын хүрээнд “Ус ба газар” дэд сэдвийн хүрээнд хамтран ажиллах боломжийг судлах

Талууд уг уулзалтыг хамтын ажиллагааг бэхжүүлэх, усны салбар дахь түншлэлийг шинэ шатанд гаргах чухал алхам хэмээн дүгнэлээ.