ШИЙДЭЛ: Малын өтөг, бууцаар био түлш үйлдвэрлэх төслийн танилцуулгыг сонслоо

БОУАӨ-ийн сайдын зөвлөх, Уур амьсгалын өөрчлөлтийн тусгай элч П.Батхишиг, Агаарын бохирдлыг бууруулах Үндэсний хорооны Ажлын албаны дарга С.Даваасүрэн нар өнөөдөр /2025.02.21/ ХААИС-ийн профессор Б.Мөнхбат, Японы “Pear Carbon Offset” компанийн захирал Казүо Сасаки нарыг хүлээн авч уулзлаа.

Уулзалтаар малын өтөг бууцыг ашиглан био түлш үйлдвэрлэх төслийн танилцуулгыг сонсож, туршилтын үйлдвэр байгуулах асуудлаар санал солилцов.

Монгол, Японы эрдэмтэд хамтран 2010 оноос судалгаа хийж, малын аргал, хомоол, хоргол, хөрзөн зэрэг био массыг ашиглан илчлэг өндөртэй био нүүрс гаргажээ.

Тэд жилд 2000-3000 тонн малын өтөг бууц ашиглан 400-500 тонн био түлш үйлдвэрлэх хүчин чадалтай туршилтын үйлдвэрийг Төв аймгийн Батсүмбэр суманд байгуулах саналтай байна.

Батсүмбэр сум нь 27 000 гаруй үхэртэй, цөөнгүй ферм үйл ажиллагаа явуулдаг учраас био түлшний түүхий эд нийлүүлэх боломжтой гэж үзжээ.

Био түлшийг карахмал буюу төмсний гурилаар барьцалдуулдаг бөгөөд илчлэг нь 7279 ккал гэдгийг Геологийн судалгаа, шинжилгээний төвд хийлгэсэн шинжилгээгээр баталгаажуулсан хэмээн танилцууллаа.