Ө.Шижир: Х.Ганхуяг өөрийн намынхандаа л чиглэл өгч, лааз өргөж байна гэж харсан

УИХ-ын гишүүн Ө.Шижир: Бодитоор ийм зүйл болсон нь үнэн. 2016 оноос хойш Монгол Ардын Нам төрийн эрх барьж ирсэн. 2016 оноос эхлэн өнөөг хүртэл, өөрөөр хэлбэл сүүлийн арван жилийн хугацаанд нийт 200 их наяд төгрөгийг захиран зарцуулсан байна. Хэрэв 2026 оны төсвийг нэмбэл нийт хэмжээ 200 их наядыг давна. Тодруулбал, 197.1 их наяд төгрөгийг МАН захиран зарцуулжээ.

Ийм их хэмжээний хөрөнгийг сүүлийн арван жилд зарцуулчхаад өнөөдөр МАН төсөвтэй холбоотойгоор гоншигнож, гомдоллох ямар ч эрхгүй гэж би үзэж байна. Тэд өөрсдийнхөө алдаа, хариуцлагыг өөрсдөөсөө хайх ёстой.

Хоёрдугаарт, УИХ-ын гишүүн бүр хуульд заасан бүрэн эрхийнхээ дагуу төсөвт санал өгөх эрхтэй. Манай намын гишүүд ч энэ бүрэн эрхийнхээ хүрээнд саналаа өгсөн. Үүнийг шүүмжлэх үндэслэл байхгүй. Түүнчлэн манай намын гишүүд санал өгснөөр төсөв данхайсан зүйл огт байхгүй, учир нь зарим зардлыг буцаан хассан байдаг. 

Сүүлийн гурван жилд буюу 2023, 2024, 2025 онд гэхэд л нийт 100 их наяд төгрөгийг зарцуулсан бөгөөд үүнд төрийн өмчит компанийн мөнгө огт ороогүй. Төр өөрөө 120 их наяд төгрөгийн хөрөнгөтэй байгаа ч энэ хөрөнгийн талаарх ил тод мэдээлэл одоогоор байхгүй байна. 

Ийм байж Ардчилсан намын гурван гишүүн төсөвт санал гаргасных нь төлөө төсөвчин гэж нэрлэж, шүүмжлэх нь үндэслэлгүй. Харин ч МАН өөрийн алдааг өөрөөсөө хайх ёстой. Эцэст нь хэлэхэд, сүүлийн арван жилд 200 их наяд төгрөг захиран зарцуулсан хүмүүс өнөөдөр бусдыг буруутгах ёсгүй” гэлээ.