УИХ-ын чуулганы нэгдсэн хуралдаан 16:00 цагаас эхэлнэ

УИХ дахь намын бүлгүүд өнөөдөр /2025.11.10/ хуралдаж, энэ долоо хоногт хэлэлцэх хуулийн төслүүдийг хэлэлцэнэ.  УИХ дахь АН болон МАН-ын бүлэг тус тус хуралдаж, ирэх оны төсөв, “Хянан шалгах түр хороо байгуулах тухай” тогтоолын төсөл зэрэг чухал асуудлуудад байр сууриа нэгтгэнэ.

 13:00 цагаас Төсвийн байнгын хороо хуралдаж, 2026 оны улсын төсвийн тухай хуулийн төслийн гурав дахь хэлэлцүүлгийг хийхээр төлөвлөжээ. Тус хэлэлцүүлэгт орлого, зарлагын нарийвчилсан задаргаа, салбарын төсвийн хуваарилалт, хөрөнгө оруулалтын санхүүжилтийн асуудлыг онцлон хэлэлцэнэ. 16:00 цагаас УИХ-ын чуулганы нэгдсэн хуралдаан товлогдсон бөгөөд хуралдаанаар “Хянан шалгах түр хороо байгуулах тухай” УИХ-ын тогтоолын төслийг /УИХ-ын гишүүн Л.Оюун-Эрдэнэ болон бусад 33 гишүүний өргөн мэдүүлсэн/ үргэлжлүүлэн хэлэлцэнэ. Мөн ирэх оны төсвийн гурав дахь хэлэлцүүлгийг үргэлжлүүлэн хэлэлцэхээр төлөвлөжээ.