Д.Жавхлантөгс: Аав ээж шигээ хүмүүсийг эмчилж байгаа учир ажлаа хаяна гэхээр өвчтөнүүддээ санаа зовж байна

Эмч нар 3.5 сая төгрөгийн цалинтай болох шаардлага тавьж ирэх долоо хоногт ажил хаялт зарлана гэдгээ мэдэгдээд буй. МЭМҮЭХ-оос тодруулахад 100 гаруй эрүүл мэндийн байгууллага ажил хаялтад нэгдэж гарын үсгээ цуглуулсан байна гэв. Тэгвэл ажил хаялтад нэгдэж байгаа бөөрний мэс заслын эмчийн байр суурийг тодрууллаа. 

Д.Жавхлантөгс: Эмч нарын хувьд цалингаа нэмүүлье гэж л хүсээд байгаа юм. Бид нар ажил хаях хэмжээнд хүрээсэй гэж хүсэхгүй байна. Гол зорилго нь цалингаа нэмж 1000 долларт  хүргэе гэсэн саналтай байгаа юм. Мэдээж энэ саналаа тавиад эхний байдлаар тайван жагсаал хийсэн. Эрүүл мэндийн салбарынхан үзэл бодлоо илэрхийлсэн ч үр дүнд хүрээгүй нийт үйлдвэрчний эвлэлийн холбооны эрүүл мэндийн салбарын бүх ажилчид маань сайн дураараа ажил хаялтад оролцохоор шийдвэр гаргаад явж байна. Ажил хаялт 11-р сарын 13-наас эхлэх товтой байна. Залуу хүн миний хувьд мэс заслын эмчээр 11 жил ажиллаж байна. 1.6 цалинтай, үндсэн цалингаасаа гадна жижүүр эмч хийдэг.  Сард 6-8 удаа жижүүр хийдэг. Сарын гуравны нэг нь байдаггүй. Татвараа төлөөд гар дээрээ  2.8 саяас 3 саяыг цалин авч байна. Сайхан мэргэжил сайхан ажил гэхдээ  бид ч адилхан хүн, бид нар хөдөлмөрөө шударгаар үнэлүүлье. Монголын эмч ажилчид шиг ийм бага цалинтай ажилтай улс гэж байхгүй. Аав ээж шигээ хүмүүсийг эмчилж байгаа учир ажлаа хаяна гэхээр өвчтөнүүддээ санаа зовж байна. Цалингаа аваад л зээлээндээ өгдөг.