Ж.Чинбүрэн: Таны уудаг эм аль эмийн санд, ямар үнэтэй худалдаалагдаж байгааг хянах боломж бүрдлээ

Эрүүл мэндийн сайд Ж.Чинбүрэн эмийн үнийг ард иргэдийн хяналтад оруулах нэгдсэн системийг танилцууллаа. Энэ систем нь 2605 эмийн сан, Монгол Улсын бүртгэлтэй эмийн жагсаалтад идэвхтэй худалдаалагдаж буй 2565 эмийн үнийн мэдээллийг газар зүйн байршлаар иргэнд ил тод харуулах юм.  Вэб сайтад нэвтрэхэд, хүмүүсийн өргөн хэрэглэдэг хоол шингээх зориулалттай "Мезимфорте" эмийг хэрэглэх заавар, хориглох зүйлс болон аль эмийн санд, ямар үнээр худалдаж байгааг харж болно. 

Системээс харахад одоогийн байдлаар Монгол Улс даяар 530 эмийн санд "Мезимфорте" худалдаалж байна.  Үүнээс Улаанбаатар хотыг шүүхэд эмийн үнэ харагдана. “Идэр угалз хайрхан” эмийн санд хамгийн хямд буюу нэг хайрцаг нь 7280 төгрөгөөр худалдаалагдаж байна. Тэгвэл “Гүн ам” эмийн санд хамгийн үнэтэй буюу 11 мянган төгрөгөөр худалдаж байна. Энэ эмийн сангийн байршлыг харахад хотын төвөөс зайтай буюу Сонгинохайрхан дүүрэгт байх жишээтэй.  Эмийн үнийн өсөлтөөс гадна эмийг эмийн сангууд ямар үнээр борлуулж байгааг иргэн та өөрөө хянах боломж бүрдэж байна. Эмийн үнэ өндөр байгааг иргэд шүүмжилдэг. Төрөөс эмийн үнийг зохицуулах гэж оролдсон, хувийн бизнес учир үр дүнд хүрээгүй. Улаанбаатар хотод 386 эмийн сан үйл ажиллагаа явуулж байна.

Нэгдсэн системийг нэвтрүүлснээр иргэд өөрийн хэрэглэх эмийг ямар эмийн санд, хэдээр худалдаж байгаа мэдээллийг цаг тутамд авах боломжийг бүрдүүлж байна. Жишээлбэл, Ханиадны "Терафлю" гэж эм зарим эмийн санд 9000, заримд нь 11 мянган төгрөгөөр зарагдаж байна. Үүнийг иргэн системээс хараад аль эмийн сангаас авахаа шийднэ. Эмийн сангууд ч энэ мэдээллийг харах тул ямар үнээр борлуулахаа бодох болно. Энэ бол зах зээлийн зарчим юм. Системийн хөгжүүлэлт үргэлжилж байна. Дараагийн шатны ажил нь улсын хилээр орсон бүх эм болон эмнэлгийн хэрэгслийг бүртгэнэ. Эмийн хугацаа хэзээ дуусахыг мөн нэгдсэн системээр мэдээлнэ гэлээ.