С. Зориг: Би Монгол хүний саруул ухаанд итгэдэг

Төр, нийгмийн зүтгэлтэн, Дэд бүтцийн сайдын үүрэг гүйцэтгэгч Санжаасүрэнгийн Зориг 1998 оны аравдугаар сарын 2-нд бусдын гарт харамсалтайгаар амиа алдсан өдөр тохиож байна.

Жил бүрийн энэ өдөр төрийн өндөрлөгүүд, хамтран улс төрд зүтгэж байсан нөхөд нь түүний хөшөөнд хүндэтгэл үзүүлдэг уламжлалтай.

Ардчиллын алтан хараацай С.Зориг агсан амьд ахуйдаа “Монгол хүний саруул ухаанд итгэдэг” гэж хэлж байсан юм. Өнөөдөр түүний гэрэлт хөшөөнд журмын нөхөд нь цэцэг өргөж гэгээн дурсгалыг нь хүндэтгэл үзүүллээ.

С.Зориг нь 1990 онд Сүхбаатарын талбай дээр өрнөсөн ардчиллын төлөөх бүх л цуглааныг тайван аргаар удирдан зохион байгуулж, 90 мянга гаруй иргэдийг ардчилсан хөдөлгөөнд уриалан дуудсан юм. С.Зоригийн удирдсан ардчилсан жагсаал цуглааны үр дүнд 1990 оны 3 дугаар сард эрх барьж байсан Монгол Ардын Хувьсгалт Намын Төв Хороо бүрэн бүрэлдэхүүнээрээ огцорч шинэ түүх эхэлсэн билээ. Тэрээр Монголын улс төр, нийгмийн өөрчлөлт шинэчлэлтийн эхлэлийг тавьж чадсан ард түмний сод хүү байсан юм. 

27 жилийн турш илрүүлж чадаагүй ил хэргийг улс төрийн сонгуулийн үеэр гаргаж, ямар ч үр дүнгүй ажилладагт  иргэд олон нийтийн хувьд бухимдалтай байдаг. Хэргийг олон нийтэд нээлттэй, ил тод болгох ёстой, шаардлагатай бол улсын их хуралд сонсгол явуулах ёстой гэж ардчилсан намын гишүүд байр сууриа илэрхийллээ.