Н.Номтойбаяр: Г.Занданшатар нүүрсний хулгайг мэдэхийн дээдээр мэдэх албан тушаал хашиж байсан

Улс төрийн нөхцөл байдалтай холбоотойгоор УИХ-ын гишүүн Н.Номтойбаяраас тодруулга авлаа. Тэрбээр, "Засгийн газрын бүрэлдэхүүнийг сонгох, чөлөөлөх  асуудал бүрэн нээлттэй байгаа. Гэхдээ  хуулийн хүрээнд зохицуулах ёстой.  Өрөөнд сууж байгаад шийдэх асуудал биш. Монгол Улсын Ерөнхий сайд Г. Занданшатар нүүрсний хулгайтай тэмцэх зорилгоор солих гэж буйгаа хэлсэн. Нэг талдаа зөв ч улс төрийн эрх мэдлийн өрсөлдөөн болж байгаа үед энэ асуудал яагаад хөндөгдөөд байгаа вэ? Монгол Улсын Ерөнхий сайд Г.Занданшатар УИХ-ын дарга байхдаа Нүүрсний болон Хөгжлийн банкны сонсголыг удирдаж ажилласан. Нүүрсний хулгайг хамгийн сайн мэдэх албан тушаал хашиж байсан. Яагаад гэнэт өчигдөр мэдэх болов? Энэ бол худлаа зүйл. Надад байгаа мэдээллээр нүүрсний хулгайгаар ял аваад байгаа Т. Аюурсайхан, Б. Ганхуяг нар ч ганц энэ асуудлаас болоод байгаа биш юм шиг байгаа юм. Юу болсон бүгдийг задалж үзэх хэрэгтэй. Улс төрийн өрсөлдөөн болонгуут хэн нэгнийг нүүрсний хулгайгч болгож цоллодог. Өмнөх 76 гишүүний үед МАН 62 суудалтай байсан.  Одоо 126 гишүүний хувьд улс төрийн эрх мэдэлд хяналт тавих баланс харьцангуй тэнцвэржиж эхэлсэн. Авилгатай тэмцэнэ гэвэл МАН-тай тэмцэнэ гэсэн үг. Нүүрсний хулгай, Хөгжлийн банкны асуудлыг  зөвхөн хавтсыг үзүүлчихээд хааж байна. Одоо хавтсыг нь нээж хуудас бүрийг нь үзмээр байна. Нүүрсний сонсголын үед гарсан мэдээ материалууд мэдэх эрхийг хангаж чадсан уу, эсвэл түүнийг ашиглаж хэн нэгэн рүү онилсон эсэхийг мэдмээр байна. Надад байгаа мэдээллээр 31 гэрээг улсын нууцад авсан, бүгдийг нь үзмээр байна" гэсэн юм.