"Засгийн газрын гишүүнийг УИХ, Ерөнхийлөгчид танилцуулснаар томилж, чөлөөлж, огцруулна"

Үндсэн хуулийн 39.4-т "Засгийн газрын гишүүнийг Улсын Их Хурал, Ерөнхийлөгчид танилцуулснаар Ерөнхий сайд томилж, чөлөөлж, огцруулна. Засгийн газрын гишүүн Улсын Их Хуралд тангараг өргөнө" гэж заасан байдаг. Мөн Засгийн газрын тухай хуулийн 23.2-т "Засгийн газрын гишүүнийг Монгол Улсын Их Хурлын чуулганы хуралдааны дэгийн тухай хуулийн 101 дүгээр зүйл, Монгол Улсын Ерөнхийлөгчийн тухай тухай хуулийн 12 дугаар зүйлийн 4 дэх хэсэгт тус тус заасны дагуу Улсын Их Хурал, Ерөнхийлөгчид танилцуулсны үндсэн дээр томилж, чөлөөлж, огцруулна. Засгийн газрын гишүүнийг томилох, чөлөөлөх, огцруулахдаа захирамж гаргана" гэж заажээ.

Гэтэл өнөөдөр Монгол Улсын Ерөнхий сайд Г.Занданшатар мэдээлэл хийж, Хууль зүйн сайдаар Б.Энхбаярыг томилж буйг танилцууллаа. Энэ талаар Засгийн газрын зарим сайд нараас тодруулахад, "Мэдээгүй"  гэх хариултыг өгч байна. Энэ талаар зарим байр суурийг хүргэж байна. 

УИХ-ын гишүүн Х.Баасанжаргал: Хууль зүйн сайдыг томилж өөрчилснөөр хэргийн хувь заяа шийдэгдэж байна гэдэг ойлголт нь хуулийн байгууллагад асар хортой. 

"Хууль зүйн сайдыг томилж өөрчилснөөр хэргийн хувь заяа шийдэгдэж байна гэдэг ойлголт нь хуулийн байгууллагад асар хортой. Иргэд төрийн эрх мэдлийн байгууллага, шүүхийн байгууллагад итгэх итгэлийн асуудал яригдана. Хэргээ шийдүүлэх гэж буй жирийн иргэний ч итгэл алдагдана. Энэ бол асар том хямрал, эргэж нэг харах боловуу гэж найдаж байна. Хэдийгээр улс төрийн маргаан байгаа ч гэсэн хил хязгаар, дүрэм журам байх ёстой. Ялангуяа үндсэн хуулиндаа захирагдах ёстой. Бид үндсэн хуулиа уландаа гишгэж болохгүй"

УИХ-ын гишүүн Ч.Лодойсамбуу: Юун хууль засаглах, “Хүн л засагладаг юм! Харцгаа та нар!”гээд ил тод хашгирчихлаа

"Бүх ард түмний нүдэн дээр ХОНГИЛынхоо харуулыг заналтайгаар сольж үзүүллээ. Юун хууль засаглах, “Хүн л засагладаг юм! Харцгаа та нар!”гээд ил тод хашгирчихлаа. Хоёрдугаарт, Авлига хулгайтай ингэж тэмцэхгүй. Үүнийг бүх юм болсны дараа жонгинох, гонгинох, өс зангиадах гэнэ"