Б.Түшиг: Залуус ном унших болсноор олон эерэг өөрчлөлтүүд гарна

Үндэсний бичиг, соёл, номын өдрүүдийн хүрээнд  зохион байгуулж буй 38 дахь удаагийн “Номын баяр” Д.Сүхбаатарын талбайд гурав дахь өдрөө үргэлжилж байна. "Номын баяр"-т өөрийн бүтээлээ танилцуулан оролцож буй Б.Түшигийг бид онцолсон юм. 

Тэрээр номын баярт ирсэн хүмүүсийн 80-90 хувь нь залуучууд байгаа нь бидний ирээдүй гэрэлтэй байна гэдгийг харуулж байна гэсэн юм. Залуучууд эргээд ном уншиж эхэлсэн нь залуусын дэлгэцийн хэрэгцээг багасгахын дээр сэтгэл зүйд ч гэсэн эерэгээр нөлөөлдөг гэдгийг хэллээ. Түүний "Мэргэжлээ хэрхэн зөв сонгох вэ" ном нь энэ удаагийн номын баяр дээр танилцуулагдаж, худалдан авагчдын гар дээр хүрч байгаа юм. Мэргэжил сонголтын талаар тэрээр, "Өөрийнхөө онцлогийг мэдэхгүйгээр тухайн үед хамгийн их суралцаж байгаа мэргэжлээр суралцах нь их байдаг. Миний үед уул уурхайн мэргэжлийг илүү түлхүү сонирхож байсан үе. Тухайн үед бүгд уул уурхайгаар сурах ёстой ч юм шиг тийм байсан. Одоо бол цаг үе маш өөр болсон. Зарим мэргэжлүүд устаж үгүй болж байхад нөгөө талд шинээр мэргэжлүүд бий болж байх жишээтэй.  Тийм болохоор сайн судалгаа хийгээд, мөн миний номыг уншиж сонирхоод ирээдүйн мэргэжлээ зөв сонгоорой. Тэгвэл ирээдүйд нь их өөрчлөлт гарах боломжтой шүү" гэж залуус дүү нартаа хандаж хэлсэн юм.