Ц.Чулуунзагдын өмгөөлөгч худал мэдээлэл няцаалт өгөх мэдэгдэл гаргажээ

МАН-ын Хэвлэл мэдээлэл, цахим бодлогын асуудал хариуцсан нарийн бичгийн дарга Ц.Чулуунзагдыг цагдан хорьсонтой холбоотойгоор олон нийтийн мэдээллийн хэрэгслээр гарч буй мэдээлэлд түүний өмгөөлөгч Б.Оюунбилэг хариу мэдэгдэл гаргажээ. Уг мэдэгдэлд, 

"Манай үйлчлүүлэгч Ц.Чулуунзагдад Авлигатай тэмцэх газраас эрүүгийн хэрэг үүсгэн яллагдагчаар татаж, цагдан хорих, таслан сэргийлэх арга хэмжээ авсантай холбогдуулан цахим орчинд болон хэвлэл мэдээллийн хэрэгслээр их хэмжээний ор үндэслэлгүй, илт худал мэдээлэллийг тарааж түүний нэр төрийг гутаах, нийгэмд яллах ажлыг зохион байгуулалттайгаар хийж байна. Өмгөөлөгчөөр нь ажиллаж эрүүгийн хэрэг үүсгэн, яллагдагчаар татсан, цагдан хорих, таслан сэргийлэх арга хэмжээ авах шүүхийн хэлэлцүүлгийн өмнө цагдан хорих үндэслэл болсон холбогдох материалтай бүрэн танилцсаны хувьд дараах илт худал мэдээллийг үүгээр няцаалт хийж байна. 

"Админерал" ХХК-ийн гүйцэтгэх захирал асан БНХАУ-ын иргэн н.Хасбаатарын ар гэрийн гомдлоор  хэрэг үүсгэн хойшлуулшгүй арга хэмжээ авч саатуулсан гэх мэдээлэл нь ор үндэслэлгүй бөгөөд тус хэргийн материалд н.Хасбаатарын ар гэрээс ямар нэгэн өргөдөл гомдол гараагүй байна. Түүнчлэн 2025 оны 9 дүгээр сарын 10-ны өдөр Тусгаар тогтнолын ордонд байрлах Ц.Чулуунзагдын ажлын өрөө гэрт нь хийсэн үзлэг шалгалтаар талийгаач н.Хасбаатартай холбоотой гэх гарын үсгийн дардас олдоогүй бөгөөд хэргийн материалд энэ талаар тэмдэглэл байхгүй. "БНХАУ-ын иргэн н.Хасбаатарын гарын үсэг бүхий дардас Ц.Чулуунзагдын ажлын байрнаас олдсон ба хуурамч  баримт, бичиг үйлдсэн байж болзошгүй нөхцөл байдал тогтоогдсон" гэх мэдээлэл нь ор үндэслэлгүй, хуурамч мэдээлэл болно. Ц.Чулуунзагдын талаар илт худал мэдээллийг, их хэмжээний хөрөнгө, хүч зарцуулан зохион байгуулж байгаа нь улс төрийн зорилготой байж магадгүй гэх хардлага төрүүлж байна. Иймд хэвлэл мэдээллийн хэрэгсэл сэтгүүлчид та бүхэн худал мэдээлэлд авталгүй мэдээллийн эх сурвалж, үнэн бодит байдлыг нягталж ажиллахыг уриалж байна" гэжээ.