П.Наранбаяр: "Багш нарын зүгээс үндсэн цалинг 3.5 саяас дээш болго" гэх шаардлага тавьж байгаа

   Энэ сарын 28-ны өдөр багш нар ажил хаялт зарлахаа мэдэгдээд байгаа. Тэгвэл энэ асуудлаар Боловсролын сайд П.Наранбаяраас тодруулсан юм. Тэрбээр, "Бид Монголын Боловсрол, Шинжлэх ухааны үйлдвэрчний эвлэлтэй гурван талт хэлэлцээр байгуулсан. 2026 он хүртэл хүчинтэй хэлэлцээр. Хэлэлцээрийн хүрээнд цалин хөлсийг 30 хүртэл хувиар нэмэгдүүлэх тохиролцоонд хүрсэн. Одоогийн байдлаар 20 орчим хувийн цалингийн нэмэгдлийг хийсэн, гэхдээ энэ нь хангалттай бус байгаа. Гэхдээ шууд ажил хаялт зарлах замаар хөдөлмөрийн хурц маргаан хийх нь аль аль талдаа халтай. Тиймээс ярилцаад хэлэлцээд явах ёстой. Бид төсвийн нөхцөл бололцоонд тулгуурлан урсгал зардал дээр цалин нэмэх ёстой гэсэн байр суурьтай байгаа. Багш нарын зүгээс үндсэн цалинг 1000 ам.доллар буюу 3.5 саяас дээш болгох шаардлага тавьж байгаа. Энэ нэмэгдлийг хийхийн тулд төсөв дээр 3.3 их наяд төгрөгийн нэмэлт санхүүжилт шаардлагатай болно. Үүнийг хаанаас гаргах вэ? гэдэг асуудал гарна" гэсэн юм.