Хууль бус тендерийн асуудлаар албаныхан байр суурь илэрхийлсэнгүй

“Дулааны Цахилгаан Станц-4” ТӨХК-иас зарласан тендер хууль бус болсон асуудлаар Сангийн яамны Хууль эрх зүйн газар, ДЦС-4 компаниас тайлбар авах гэсэн боловч "Мэдээлэл өгөх боломжгүй" гэлээ.  “Дулааны Цахилгаан Станц-4” ТӨХК-иас зарласан тендер хууль бус болсон асуудлаар  “Френдстранспорт тийм” ХХК-иас Сангийн яаманд гомдол гаргасан юм. Учир нь тендерт хамгийн бага үнийн санал өгсөн туршлагатай компанийг бус 400 сая төгрөгийн өндөр үнийн саналтай, шалгаруулалтад заасан тоног төхөөрөмжийн шаардлага хангаагүй “Эм Ти Эм Жи” ХХК-ийг шалгаруулсан байгаа юм. ТӨРИЙН БОЛОН ОРОН НУТГИЙН ӨМЧИЙН ХӨРӨНГӨӨР БАРАА, АЖИЛ, ҮЙЛЧИЛГЭЭ ХУДАЛДАН АВАХ ТУХАЙ хуулийн 27.5-д “Тендерийг энэ хуулийн 11.4.1-д зааснаар үнэлэхэд харьцуулах үнийг, энэ хуулийн 11.4.2-т зааснаар үнэлэхэд санхүү, төсвийн асуудал эрхэлсэн Засгийн газрын гишүүний баталсан аргачлал, зааврын дагуу тооцсон үнийг тус тус өсөх дарааллаар эрэмбэлж, эхэнд эрэмбэлэгдсэн тендерийг хамгийн сайн тендер гэж үзнэ” гэсэн байдаг. Гэтэл 400 сая төгрөгөөр өндөр үнийн саналтай, тоног төхөөрөмжөө түрээсээр хайж буй компанийг шалгаруулсан нь анхаарал татна.