Л.Мөнхбаясгалан: Тав хоног над шиг муу хүн Монголд байсангүй

УИХ-ын гишүүн Л.Мөнхбаясгалан "Би АН-ын даргад нэрээ дэвшүүлэхээ тав хоногийн өмнө зарласан. Энэ өдрүүдэд Монгол Улсад над шиг муу хүн байсангүй. Зохион байгуулалттай асар их  мөнгөөр харлууллаа. Би мөнгийг нь дийлэхгүй юм байна. Би ийм зүйлд нугарна гэж байхгүй. Хүнийг хүний олон барьдаггүй юм. Хайрцаглагдсан үндэсний бодлогын хороогоор намын дарга шууд сонгоно гэж байна. Энэ нь намын дүрмээ зөрчинө. Мөн дээд шүүх дээр бүртгүүлэхгүй. Дахиад 2-3 тамгатай болох байх. Үндэсний бодлогын хорооны хугацаа 2022 онд дууссан. Манайд 160 сум даргагүй байгаа. 15 аймаг ялагдсан, найман дүүрэг даргагүй байгаа. Эд нар сонгуулиа хийж чадахгүй байгаа юм. Ийм нөхцөл байдалд Үндэсний бодлогын хороог хэдхэн хүн худалдаж аваад хайрцагласан. Үүн дээр АН-ын даргыг тавилаа гэдэг драмм явах гэж байна. Ардчилсан нам ардчиллаараа даргаа сонголоо гэсэн жүжгээ болих хэрэгтэй. Монголд ганцхан төрлийн бизнесс байгаа нь уул уурхай. Тэр нь Оюутолгой, Эрдэнэс Тавантолгой Үе үеийн намын дарга, Ерөнхий сайд, Ерөнхийлөгч Эрдэнэтийн зэс дээр квот авдаг. Оюутолгойгоос авлигал авдаг. Тавантолгойгоос юу авах уу гэдгээ шийддэг. Мөн банк бий. Энэ нь иргэдээ луйварддаг тонуулчид. Би АН-ын даргад нэрээ дэвшүүлснээр намын удирдах албан тушаалуудыг зардаг нөгөө намтайгаа хуйвалддаг, гадныханд найр тавьдаг байдал дээр эргэлт хийх гэсэн юм. Үүнд дургүй байгаа юм байна. Хүлээн зөвшөөрөхгүй байна. Одоо жүжгээ тавиад нэг нь нэрээ дэвшүүлээд нөгөөх нь өрсөлдсөн болоод хүлээн зөвшөөрөх байх. Би ямар тохиолдолд АН-ын дарга байхыг хүсэж байна гэхээр АН-ын жирийн гишүүдээс мандат авсан хүчирхэг намын дарга баймаар байна. Манай нам гишүүдээсээ сонгох сонгогдох эрхийг нь булааж авч байгаа юм. Зөвхөн Үндэсний бодлогын хороо нь шийднэ гэнээ. Үүнийг АН-ын гишүүд хүлээн зөвшөөрч болохгүй. Энэ нь цаашаа явсаар Монголын ард түмнээс сонгох, сонгогдох эрхийг нь булааж авна гэсэн үг. Дараагийн удаа хэн Ерөнхий сайд, Ерөнхийлөгч болж Монголын хаан суусан Эрдэнэтэд зэсийн наймааг хэн толгойлох юм. Хэн Монголыг ядуу байлгах төлөвлөгөөг зурах юм. Хэдэн хүн баяжих юм. Хэдэн хүн ашиг олох юм. Наймаа ингэж явагдана. Үндэсний хэмжээний хоёр том нам ээлж дараалан намын даргаа сонгож гэж байна. өөрчилье гэсэн юм, өөрчлөгдөхгүй бол хайрцаглагдсан тоглоомд орохгүй" гэлээ.