Эрчим хүчний алдагдлыг ажилчин амь насаараа үүрч байна

ДЦС-3 ТӨХК-нд гарсан үйлдвэрлэлийн осол болон хүний амь нас эрсэдсэн асуудлаар Монголын эрчим хүч, геологи, уул уурхайн үйлдвэрчний эвлэлийн холбоо байр сууриа илэрхийллээ.

Ингэхдээ  “Эрчим хүчний салбар нь Монгол Улсын үндэсний аюулгүй байдлыг хамгаалах үүрэгтэй чухал тэргүүлэх салбар боловч техник технологи нь хоцрогдож хуучирснаас гадна техникийн шинэчлэлт хийх төсвийг дорвитой шийдэж чадсангүй. Эрчим хүчний салбар засаглалын хувьд хямралд орсон. Энэ салбарын бодлогыг хэн хэрэгжүүлж байгаа нь тодорхойгүй. Төрийн өмчит компаниудын бүтэц зохион байгуулалтын өөрчлөлтийг хийхдээ нэгдсэн бодлого, уялдаа холбоогүй явж ирлээ. Мэргэжлийн бус томилгоог энэ салбарт сайдаас эхлээд үйлдвэр, аж ахуйн нэгжийн ИТА түвшинд хийж ирсэн нь туршлагатай, ур чадвартай, мэргэжлийн ажиллагсад гадуурхагдах, ажиллах итгэл, урам зориггүй болох, ажлаас гарахад нөлөөлөх болсон. Өөрөөр хэлбэл, энэ салбарт боловсон хүчний бодлого алдагдсан нь хөдөлмөрийн аюулгүй байдалд шууд нөлөөлж байна. Хөдөлмөрийн аюулгүй байдал зөвхөн цаасан дээр л байна. Эрчим хүчний алдагдлыг ажилчин хүн амь насаараа үүрч байна. Хүний амь үнэ цэнтэй байх ёстой. Аваарийг зогсоохын төлөө амь насаа зориулж байна. Эрүүл, амьд байх баталгаа алга. Хөдөлмөрийн хүнд, хортой, халуун нөхцөлд, өндөр аюул эрсдлийн дунд ажилладаг. Эргэн тойронд өндөр хүчдэл, эргэх механизм, өндөрт ажиллах, өндөр даралттай уур ус гэх мэт маш аюултай орчинд ажилладаг онцлогтой. Тоноглолууд маш их хуучирсан. Насжилт өндөртэй. Тоног төхөөрөмжийн шинэчлэл бүү хэл шаардлагатай засвараа хийж чадахгүй байгаа. Ажилтнууд илүү цагаар хонон өнжин ажиллаж байна. Янз бүрээр аргалаад аргацаагаад явуулж байна. Ослын суурь шалтгааныг судалж, урьдчилан сэргийлэх арга хэмжээг хэрэгжүүлдэггүй. Ослын буруутанг хайдаг. Ослыг хэн нэгэн хүнд хариуцлага тооцоод орхидог. Ер нь явж, явж ажил үүргээ гүйцэтгэж байсан хүн арга хэмжээ авахуулаад л дуусдаг. Эрүүл аюулгүй ажлын байрыг хангах үүрэгтэй төр нь, яам нь хариуцлага хүлээдэгүй. Төрийн байгууллагуудын алдаатай шийдвэрийн хүндийг ажилтнууд нуруун дээрээ үүрч ирлээ. Хөрөнгө мөнгө, хүний нөөцийн дутагдалд орсон, тоноглол нь хуучирсан, банкнаас зээлж цалингаа тавьдаг байдалтай болсон байна. Бид хэнд харьяалагдаж, хэнээр удирдуулж байгаагаа мэдэхгүй байна” гэв.