Тэтгэврийн зээлийг хуучин жишигт оруулж хэвийн олгох талаар Монголбанкинд ханджээ

Монгол банкны Мөнгөний бодлогын хорооны ээлжит хурал болох гэж байгаатай холбогдуулан УИХ-ын гишүүн С.Эрдэнэбат дахин албан хүсэлт явууллаа. Уг бичигт, "Тэтгэврийн зээл олгох хугацаа, нөхцөлийг хуучин жишигт оруулж, хэвийн олгож эхлэх талаар тодорхой арга хэмжээ авч хариу ирүүлэхийг хүсье" гэжээ. Ахмад настнуудын зүгээс тэтгэврийн зээлийн хүү нэмэгдэж, зээл олгох хувь хэмжээг эрс багасган хязгаарласан нь хүндрэлтэй байгаа талаар санал гомдол УИХ-ын гишүүн С.Эрдэнэбатад ирсээр байгаа тул ийнхүү дахин Монгол банкинд хандаж буйгаа тэрээр хэлж байна.