О.Батнайрамдал: Том төслүүд эхлэх гэхээр л улс төрийн тогтворгүй байдал үүсдэг

УИХ-ын гишүүн О.Батнайрамдалын байр суурийг тодрууллаа. Тэрбээр, "Баялгийн санг бид олон жил ярьсан, өнөөдөр хууль нь хэрэгжээд цааш явах гэхээр л "Засгийн газар огцор" гэдэг нөхцөл байдал үүсч байна.  Монгол улсын эрх ашгийн төлөө л бид нэгдэх ёстой. Хамтарсан Засгийн газар олон жил гацсан хоёр том төслийг явууллаа. Маш олон тэмцлийн ард гарч байж бид өнөөдөр Баялгийн сангийн тухай хуулиа батлаад, төмөр замын төслөө албажуулаад байна. Цаашлаад "Онтре гоулд"-ын асуудал мөн яригдаж байна. Энэ бол хэдэн тэрбум ам.долларын асуудал. Дараагийн 20, 30 жилд Монгол Улсын эдийн засагт ямар нөлөө үзүүлэхийг ярьж байна. Ийм том асуудлууд ярихаар Засгийн газрын тогтворгүй байдал, Засгийн газрыг огцруулах асуудал яригддаг.  Хамтарсан Засгийн үед олон жил гацсан төслүүдийг урагшлуулж чадлаа. Энэ чигээрээ дахиад үргэлжлэх боломжтой бол би үүнийг нь дэмжинэ. Энэ том төслүүд үргэлжилж байж эдийн засагт эерэг нөлөө үзүүлнэ" гэв.