Монгол Улсаас 37 иргэнийг албадан гаргажээ

 Гадаадын иргэн харьяатын газраас өнгөрсөн долоо хоногт зохион байгуулсан хяналт шалгалтаар холбогдох хууль, тогтоомж зөрчсөн долоон орны 37 иргэнийг Монгол Улсаас албадан гаргажээ.

Үүнд Хятадын 19, ОХУ-ын 12, Солонгосын хоёр иргэн багтсан байна. Мөн бусад орны дөрвөнийг албадан буцаасныг албаныхан онцлов. Эдгээр нь виз, оршин суух зөвшөөрлийн хугацаа хэтрүүлэх, аялах зорилгоор орж ирсэн ч эрх бүхий байгууллагын зөвшөөрөлгүй хөдөлмөр эрхлэх, ирсэн зорилгоосоо өөр үйл ажиллагаа явуулсан зэрэг зөрчил гаргасан аж. Тухайлбал, Түр ирэгчийн визийн хугацаа хэтрүүлэн Монгол Улсад 12.7 жил хууль бусаар оршин сууж байсан БНСУ-ын иргэнийг илрүүлж, албадан гаргасан байна. Мөн албадан гаргасан иргэдийн дийлэнх хувийг эзэлж буй БНХАУ-ын иргэд нь аяллын зорилготой К2 ангиллын цахим виз ашиглан хөдөлмөр эрхлэх зөрчил гаргажээ. Харин ОХУ-ын иргэд нь хоёр улсын хэлэлцээрийн дагуу визгүй зорчих нөхцөлийн дагуу ирэхдээ шашны үйл ажиллагаа явуулж, зорилгоосоо өөр үйл ажиллагаа явуулсан аж. Иймд дээрх иргэдэд Зөрчлийн тухайн хуулийн дагуу торгууль ногдуулж, зөрчлөөс хамааран 1-3 жилийн хугацаанд Монгол Улсад дахин оруулахгүй байх хугацаа тогтоов.

Гадаадын иргэн, харьяатын газраас жуулчлах зорилгоор зорчиж буй гадаадын иргэд аяллын визийг зорилгоосоо өөрөөр ашиглахгүй байх, уригч аж ахуйн нэгж, байгууллагууд гадаадын иргэдийг эрх бүхий байгууллагын зөвшөөрөлгүй, хууль бусаар ажиллуулахгүй байхыг зөвлөж, анхааруулга мэдээллийг удаа дараа хүргэж байгаа ч дээрх төрлийн зөрчил буурахгүй байгаа юм байна. Тиймээс хяналт шалгалтыг улам чангатгаж, хууль тогтоомж зөрчиж, хууль бус үйлдэл гаргасан гадаадын иргэн, уригч иргэн, аж ахуйн нэгж байгууллагуудад хуулийн дагуу хатуу хариуцлага хүлээлгэхийг анхаарууллаа.