Б.Пүрэвдорж: Хамгийн том хулгай "Эрдэнэс Тавантолгой" дээр явж байна

УИХ-ыг гишүүн Б.Пүрэвдорж "Жил бүр төсвийн төсөл орж ирдэг. Үүнийгээ жилд хоёр удаа сольдог. 2021 онд гэхэд дөрвөн удаа сольсон. Төсөв тодотгох бүрд гоё зүйл нь алга болоод байна. Гишүүд семинар хийж, гадаадаар зугаалахдаа онгоц, нисдэг тэргээр явдаг. Семинарт ирсэн хүмүүс сайддаа алга ташна. Энэ жил дахиад энэ байдал давтагдаж байна. Учир нь ирэх жил ийм зүйл байхгүй. Өнөөдөр төсвийн төсөл гээд 33 их наяд хуваарилах гээд яриад сууж байх хооронд хамгийн том хулгай "Эрдэнэс Тавантолгой" дээр явж байна. Нүүрсээ өндөр хэлээд их орлого олно гэдэг. Нүүрснээс хулгайлдаг хүмүүс "Эрдэнэс Тавантолгой" болсон. Нэг жишээ гэхэд Админерал,  Энержи ресурс компани уурхай дотроо баяжуулах үйлдвэр барьж байхад "Эрдэнэс Тавантолгой" 14 их наядаар 30 сая тонн нүүрс баяжуулна гэж үйлдвэр барьсан. Үүнийг ашиглахаар ойролцоогоор 10 сая тонн нүүрс баяжуулах үйлдвэр барьсан. Үүнийгээ нэг их наяд төгрөгөөр барьсан. Одоо тэнд дарга нар нь дахиад тендер зарлана, конивер явуулна. Үүнээсээ мөнгө авна гээд байж байгаа. Ийм байдлаар хулгай шат шатанд явсан.  Тэнд гол зүйлийг нь худалдан авах газрын дарга нь хийдэг. Тэр нь жинхэнэ хулгайч. Тэд нарын хажууд энд байгаа УИХ-ын гишүүд, сайд нар сураггүй. Жишээ нь Лувсанжамцаа чамайг очиход гөлөг гэж тоохгүй.  Ийм даварсан дампуурсан газар. Үүнийг цэгцлэхгүй, төсөв ярьж, хийх хэрэггүй. Дунд шатанд хулгай хэрээс хэтэрлээ. Энэ асуудлыг цэгцлэх хэрэгтэй. Хөдлөх бүрд мөнгө болчихсон. УИХ, Засгийн газар манлайллаа үзүүл. Жагсаад тэмцээд байна. Яагаад иргэд шахалт шаардлагагүйгээр жагсаж байна гэхээр татвар нь өндөр, бизнес явахгүй байгаатай холбоотой. Бүх шатны авлигад иргэд, бизнес эрхлэгчид дургүйцэж байна. Ажилчдынхаа цалинг арай гэж тавиад амьдралаа үргэлжлүүлж явна" гэлээ.