21 жил хүлээгдсэн Гашуунсухайт-Ганцмод боомтын хил дамнасан төмөр замын бүтээн байгуулалтыг эхлүүллээ

Монгол Хятадын Гашуунсухайт-Ганцмод төмөр замын бүтээн байгуулалтын нээлт болж байна. Нээлтийн үеэр Монгол Улсын ерөнхий сайд Л.Оюун-Эрдэнэ үг хэллээ. Тэрбээр, 

"Монгол Улс БНХАУ-ын хооронд 1955 оны хэлбэрээр байгуулсан Замын-Үүд-Эрээний төмөр замаас хойш хийж буй хоёр дахь төмөр замын бүтээн байгуулалтын албан ёсны ажил 70 жилийн дараа эхэлж байна. Энэ бол түүхэн өдөр юм. Гашуунсухайт-Ганцмод боомтыг төмөр замаар холбох Засгийн газар хоорондын хэлэлцээрийг 2025 оны хоёрдугаар сарын 14-нд байгуулж байсан. Тэрнээс хойш гурван сарын хугацаанд хурдтай хөгжлийн төлөө зориг гарган мэргэжлийн өндөр түвшинд шуурхай ажилласан хоёр улсын Засгийн газрын байгууллагууд, төрийн албан хаагч, аж ахуйн нэгжүүд тэр дундаа "Эрдэнэс Монгол" болон "Эрдэнэс Тавантолгой", "Чайна энержи" группийн хамт олон, ажлын хэсгийн сайд нар, мэргэжлийн эрдэмтэн судлаачдад  талархал илэрхийлж, баяр хүргэе. Монгол Улсын хамтарсан Засгийн газраас 14 мега төслийг зарласан. Л.Гантөмөр, Т.Доржханд дарга нар маань хүрэлцэн ирсэн байна.

Гашуунсухайт хилийн боомтын экспорт, импортыг 22 гарцтай болгож, хүчин чадлыг хоёр дахин нэмэгдүүлснээр улсын эдийн засаг, гадаад худалдаанд эерэг нөлөө үзүүлэхээс гадна орон нутгийн иргэдийн амьдралын чанар, орлогын эх үүсвэрийг шинээр бий болгож чадна. 

Монгол Улс, БНХАУ-ын эдийн засгийн түншлэл, эрчимтэй хөгжлийн шинэ эрин, шинэ хуудас нээгдэж байна. Нүүрсний экспорт 165 сая тоннд хүрч жилд 1.5 тэрбум ам.доллар нэмэгдэж, нэг хүнд ногдох ДНБ 10 мянган ам.долларт хүрэх Засгийн газрын зорилт хангагдаж, эдийн засаг тэлэх үндсэн нөхцөл бүрдэнэ. 

Төмөр зам холбогдсоноор олон улсын худалдааны дайн, геополитикийн өрсөлдөөн хурцдаж, тодорхойгүй байдал үүсэж буй энэ цагт Монголын экспорт тогтворжих давуу талтай. Мөн дэлхийн гангийн талаас илүү хувийг үйлдвэрлэдэг БНХАУ-д нүүрсийг урт хугацаанд тогтвортой, найдвартай нийлүүлэх хамгийн итгэлт түнш байх боломж Монгол Улсад бүрдэж байна" гэв.