Хөгжлийн банкны чанаргүй зээлээс 114 тэрбум төгрөгийн эргэн төлөлт хийгджээ

Хөгжлийн банк нь Евро болон Самурай бондын төлбөрийг хугацаанд нь барагдуулан олон улсын хөрөнгө оруулагчдын өмнө хүлээсэн үүргээ биелүүлжээ. Мөн дүрмийн сангаа 1.5 их наяд төгрөгөөр нэмж, чанаргүй зээлээс 114 тэрбум төгрөгийг төлүүлэн, 1.03 их наядын үүргээс чөлөөлөгдөх гэхчлэн санхүүгийн үзүүлэлтээ сайжруулах суурь алхмууд хийж байгааг Хөгжлийн банкны гүйцэтгэх захирал З.Нарантуяа онцоллоо.  

Түүнчлэн тэрбээр эрх зүйн орчноо сайжруулж, засаглал, менежментээ олон улсын стандартад нийцүүлэх бодлогын шинэчлэл хийж байгаагийн зэрэгцээ улс орны эдийн засгийн төрөлжилтийг нэмэгдүүлэх, экспортыг дэмжих салбарууд болох сэргээгдэх эрчим хүч, хөдөө аж ахуй, уул уурхай, тээвэр, ложистик, боловсруулах үйлдвэрлэл зэргийг зорилтот зах зээлээр тодорхойлсныг тэмдэглэлээ.

Дээрх хуралдааны үеэр Монгол Улсын Ерөнхий сайд Л.Оюун-Эрдэнэ Хөгжлийн банкны хуулийн төсөлд хувийн хэвшлийнхний санал маш чухал гээд экспорт, импортын баримжаатай Эксим банк болгохыг Засгийн газар дэмжсэн, хуулийн төслийг УИХ-д удахгүй өргөн барина гэдгийг онцолсон юм. 

Хөгжлийн банкны хуулийн шинэчлэлийн талаар “M-Си-Эс холдинг” ХХК-ийн ерөнхий захирал Ж.Оджаргал, “Шунхлай холдинг” ХХК-ийн ерөнхийлөгч П.Батсайхан, “Монголын эдийн засгийн форум” НҮТББ-ын ерөнхий нарийн бичгийн дарга Ч.Ганхуяг нар саналаа хэлэв. Тэд “Хөгжлийн банкны эрсдэлийн удирдлагыг сайжруулах, засаглалын асуудлыг өөрчилж, улс төрийн нөлөөллийг багасгах шаардлагатай. Хөгжлийн банкны төслүүдийг олон улсын санхүүгийн байгууллагуудтай хамтарч санхүүжүүлбэл хяналт сайжирна” хэмээн дурдлаа.