​Д.Пүрэвдаваа: Хэвлэл мэдээллийн байгууллага, сэтгүүлчид ямар ч тохиолдолд эрүүгийн хуулиар шийтгүүлэх ёсгүй

УИХ-ын чуулганы өнөөдрийн хуралдаанаар Хэвлэл мэдээллийн эрх чөлөөний тухай хуулийн шинэчилсэн найруулгын төслийг үзэл баримтлалын хүрээнд хэлэлцэх эсэх талаар санал хураалт явуулахад УИХ-ын гишүүдийн олонх нь дэмжлээ. Ингэснээр тус хуулийн төсөл болон хамт өргөн мэдүүлсэн хуулийн төслүүдийг анхны хэлэлцүүлэгт бэлтгүүлэхээр холбогдох байнгын хороонд шилжүүлэхээр болсон юм. Энэ талаар гишүүдийн байр суурийг сонсож байна. 

УИХ-ын гишүүн Д.Пүрэвдаваагаас энэ талаар тодруулахад, "Хэвлэл мэдээллийн байгууллага, сэтгүүлчид ямар ч тохиолдолд эрүүгийн хуулиар шийтгүүлдэггүй байх ёстой. Мэргэжлийн байгууллага нь хариуцлага нь дотооддоо ёс зүйн асуудлаа шийддэг байх  ёстой. Тэгэхгүй болохоор төр оролцоод байгаа юм. Төр өөрөө хэтэрхий данхар болчихоод, тэрийг нь шүүмжилсэн сэтгүүлч инфлүүнсэрийг цагдаа, прокурор нь шалгаж залхаан цээрлүүлж байна. Төрийн байгууллага нь хэвлэлийн үйл ажиллагаанд оролцдог гэдэг нь илэрхий болчихсон. Үүнийг зоригтойгоор өөрчлөх ёстой" гэв.