Л.Мөнхбаясгалан: Сэтгүүлчдийн эрх зүйн байдал улам л дордож байна

УИХ-ын чуулганы өнөөдрийн хуралдаанаар Хэвлэл мэдээллийн эрх чөлөөний тухай хуулийн шинэчилсэн найруулгын төслийг үзэл баримтлалын хүрээнд хэлэлцэх эсэх талаар санал хураалт явуулахад УИХ-ын гишүүдийн олонх нь дэмжлээ. Ингэснээр тус хуулийн төсөл болон хамт өргөн мэдүүлсэн хуулийн төслүүдийг анхны хэлэлцүүлэгт бэлтгүүлэхээр холбогдох байнгын хороонд шилжүүлэхээр болсон юм. Энэ талаар гишүүдийн байр суурийг сонсож байна.

УИХ-ын гишүүн Л.Мөнхбаясгалангаас тодруулахад, "Мэргэжлийн сэтгүүлчийн үйл ажиллагаа, хувь хүний үг хэлэх үзэл бодлоо чөлөөтэй илэрхийлэх эрхийн асуудал хоёрыг салгаж ойлгох ёстой.  Миний хувьд энэ салбарт 28 жил ажилласан учраас зовлон жаргалыг нь мэднэ. Сэтгүүлчдэд зүгээр л мэдээлэл авах эрхийг нь нээгээд өг. Тэгсэн тохиолдолд хүн гүтгэх эрх чөлөөгүй болно. Тэр тохиолдолд хүн гүтгэсэн бол хариуцлагаа үүрэх ёстой. 

Төрийн алба хэвлэлийн албатай байх асуудал буруу. Засгийн газар, УИХ-ын ажлын алба, сайдын хэвлэлийн албыг татан буулгах хэрэгтэй" гэв.