”Тэгш эрх – Тэгш оролцоо” Дундговь аймгийн хүүхдийн 14 дүгээр чуулганыг зохион байгуулж байна

Дундговь аймгийн нийт хүүхэд багачуудын хөгжил, хамгаалал, оролцоог дэмжих, тэднийг дуу хоолойг сонсох, чуулганаас гарсан шийдвэрийг төрд уламжлах зорилгоор аймгийн хүүхдийн чуулганыг зохион байгуулж байна.

Энэ үеэр "Хүүхдийн төлөө аймгийн зөвлөл"-ийг шинэчлэн байгуулсан бөгөөд Засаг дарга бөгөөд Хүүхдийн төлөө аймгийн зөвлөлийн тэргүүн С.Мөнхчулуун чуулганы нээлтэд хэлсэн үгэндээ хүүхдийн дуу хоолой, санал санаачилга, үйл ажиллагаа, хөгжлийг дэмжиж ажиллахаа илэрхийлж, мэндчилгээ дэвшүүлэн чуулганы үйл ажиллагаанд амжилт хүслээ.

Монгол улсад хүүхдийн байгууллага үүсч хөгжсөний 100 жилийн ой энэ жил тохиож буйтай холбогдуулан энэ удаагийн чуулганд 300 хүүхэд оролцуулж байгаа нь онцлог болж байна.

Чуулганд аймгийн Засаг дарга бөгөөд Хүүхдийн төлөө аймгийн зөвлөлийн тэргүүн С.Мөнхчулуун, Гэмт хэрэг зөрчлөөс урьдчилан сэргийлэх ажлыг зохицуулах салбар зөвлөлийн дарга Ж.Мөнхчулуун, аймгийн Засаг даргын тамгын газрын Нийгмийн бодлогын хэлтсийн дарга Ц.Эрдэнэсүрэн, Боловсролын газрын дарга Ц.Уранбямба, Тэнгэрийн тэмдэг хүүхдийн театрын дарга А.Ууганбаяр, Ид шидийн орон Дундговь хүүхэд хөгжил, хамгааллын төвийн захирал Н.Урансайхан нар зочноор оролцлоо.
“ТЭГШ ЭРХ – ТЭГШ ОРОЛЦОО” Хүүхдийн 14 дүгээр чуулганд оролцогч, төлөөлөгч нарт Тэнгэрийн тэмдэг хүүхдийн театраас урлагийн мэндчилгээ дэвшүүллээ.