Эрчим хүчний зохицуулах хорооны үйл ажиллагаанд хийсэн хяналт шалгалтын тайланг танилцууллаа

Монгол Улсын сайд, Хяналт, үнэлгээний үндэсний хорооны даргын 2025 оны хоёрдугаар сарын 18-ны өдрийн үүргийн дагуу Засгийн газар дахь хяналтын тухай хуулийн 10 дугаар зүйлийн 10.1.2 дахь хэсэгт зааснаар Эрчим хүчний зохицуулах хорооны зарим үйл ажиллагаанд Ерөнхий хянан шалгагчийн 2025 оны хоёрдугаар сарын 19-ний өдрийн 01/10 дугаар удирдамжийн дагуу хяналт шалгалтыг хийж гүйцэтгэсэн бөгөөд тайланг Эрчим хүчний зохицуулах хорооны удирдлагуудад танилцууллаа.

Эрчим хүчний зохицуулах хорооны үйл ажиллагаанд хийсэн хяналт шалгалтын тайланг танилцуулахад Засгийн газрын Хяналт хэрэгжүүлэх газрын дарга Ч.Өнөрбаяр, Хяналт шалгалтын газрын дарга Б.Ундраа, Эрчим хүчний зохицуулах хорооны дарга Э.Түвшинчулуун, зохицуулагч П.Товуудорж, Л.Дашмягмаржав, Ажлын албаны дарга Б.Болор-Эрдэнэ, Үнэ тарифын газрын дарга Б.Эрдэнэбулган нар оролцлоо.

Засгийн газрын Хяналт хэрэгжүүлэх газрын дарга Ч.Өнөрбаяр хэлэхдээ, Хяналт шалгалтын хүрээнд зарчмын шаардлага хүргүүлж ажиллана. Иргэдийн ирсэн санал гомдлын ихэнх хувь нь эрчим хүч тасардаг, хязгаарлалт хийгддэг, айл өрхийн цахилгаан эрчим хүчний үнэ тарифыг бодит өртөг, зардалд үндэслэн өөрчлөх, шинэчлэн тогтоох хэрэгцээ шаардлага байгаа төдийгүй тооцоо судалгаатай шийдвэрийг хэрэгжүүлэхэд анхаарч ажиллахыг хүслээ.

Энэхүү тайланд дурдсан нөхцөл байдал нь Эрчим хүчний салбарын бие даасан байдлыг алдагдуулж, улсын төсөвт нэмэлт ачаалал үүсгэх, цаашид индексжүүлэлт болон тарифын зохицуулалтыг тогтмол хийхгүй бол санхүүгийн хүндрэл улам гүнзгийрч, үүнээс үүдэн тарифыг огцом нэмэгдүүлэх шаардлага дахин тулгарах эрсдэлтэй байгааг дурдлаа.