Ц.Даваасүрэн: Татвар төлдөггүй газар гэж хаана байдаг юм бэ?

Төсвийн байнгын хорооны дарга Ц.Даваасүрэн: Хотын бүст автомашины татварыг нэмсэн нь дээр. Татвар нэмэхгүй, хуучин машин оруулж ирээд байх юм бол хотын замын ачаалал дийлдэхгүй. Сүүлдээ бүр гамшиг болно шүү. Ямар ч зам тавиад нэмэргүй, зогсоол болгож байна. 

Төсвийн байнгын хорооны хурлаар автотээврийн татварыг хүчингүй болгох асуудал орох гэж байгаа юм байна? 

Энэ зүгээр танилцуулах юм. Иргэдийн саналаар хэлэлцэх ёстой гэсэн учир эхний хэлэлцүүлэг хийгдэнэ. Татварын ажлын хэсэг томилогдсон. Тэр ажлын хэсэгт ахин яригдаад орж ирэх юм. 

Та хувь хүний албан татварыг 10-1 болох дээр ямар байр суурьтай байна. 

Жаахан үндэслэлгүй байх. Эдийн засгийн нөхцөл байдал сайнгүй, ганц нүүрнээс хамааралтай байна. Энийг өөрчлөх хэрэгтэй. Сая нүүрний үнэ унахад эдийн засагт нөлөөлж байна. Татвар төлдөггүй газар гэж хаана байдаг юм бэ? Үхэх үнэн, татвар төлөх үнэн гэдэг шүү дээ. Татвар төлөхгүй бол энэ улс орон чинь амьдрахгүй шүү дээ.