“Фронт” С.Цэгмид гуайд хүндэтгэл үзүүллээ

Аугаа их эх орны дайны ялалтын 80 жилийн ойн хүрээнд ОХУ-аас ажлын хэсэг Дундговь аймагт ажиллаж “Фронт” С.Цэгмид гуайд хүндэтгэл үзүүллээ.

 ОХУ-ын ЭСЯ-ны дэргэдэх цэрэг, агаарын цэргийн атташе, хошууч генерал П.В.Петрунингээр ахлуулсан ажлын хэсэг Дундговь аймагт дөрөвдүгээр сарын 01-ний өдөр ажиллаж, аймгийн Засаг дарга С.Мөнхчулуун хүлээн авч уулзлаа.

Тус ажлын хэсэгт Дайн, энхийг дэмжих ажиллагаанд оролцогчдын хорооны ерөнхий нарийн бичгийн дарга хурандаа Г.Лүндэн, Монгол оросын нийгэмлэгийн дэд тэргүүн Ё.Максим, Монгол цэргийн нэгдсэн холбооны гишүүн хурандаа Амарсайхан нар болон баримтад киноны бүрэлдэхүүн ирсэн юм.

Энэхүү айлчлалын хүрээнд дэлхийн II дайны хүнд хэцүү цаг үед ард түмний найрамдал, хамтын ажиллагаа, харилцан ойлголцлыг бэхжүүлэхэд онцгой үүрэг гүйцэтгэж, монголчуудынхаа сэтгэлийн бэлэг, тусламжийг фронтод хүргэлцэж явсан Дундговь аймгийн Сайхан-Овоо сумын харьяат ахмад дайчин, улсын сайн малчин Сүрэнхорын Цэгмид гуайд дээрх ажлын хэсгийн бүрэлдэхүүн биечлэн очиж хүндэтгэл үзүүлэн, 80 жилийн ойн хүндэт медалиар шагналаа.

Эдүгээ 102 насыг зооглож яваа С.Цэгмид гуайд Оросын Холбооны Улсын Ерөнхийлөгчийн зарлигаар Аугаа их эх орны дайны ялалтын 80 жилийн ойн хүндэт медалиар шагнагдсанд аймгийн Засаг дарга С.Мөнхчулуун баяр хүргэн мэндчилгээ дэвшүүлж, гарын бэлэг илгээснийг Цэргийн штабын дарга дэд хурандаа Ө.Баясгалан гардуулсан юм.

Мөн 1945 оны чөлөөлөх дайнд оролцож явсан Дундговь аймгийн Дэрэн сумын харьяат ахмад дайчин Намсрайн Пүрэвжалба гуайд ойн хүндэт медалийг Оросын Холбооны Улсын Элчин сайдын яаман дээр хүндэтгэн гардуулснаас гадна 80 жилийн ойн хүндэт медалийг ахмад дайчдад гардуулав.

Монгол түмний Улаан арми, Зөвлөлтийн ард түмэнд зориулсан нийт 237 вагон тусламжийн цуваа “1942 оны арван нэгдүгээр сард Зөвлөлт Холбоот Улсыг зорьсон бөгөөд Монголын ард түмний үйлдвэрлэсэн өвлийн хүрэм, шинель, нэхий дээл, гутал болон хоол хүнс ачсан байжээ.