Б.Чойжилсүрэн:Дулааны үнэ үйлдвэрлэлийн өртгөөс 2.5 дахин хямд байгаа нь ужиг хүндрэлүүд үүсгэсэн

Цахилгааны үнийн нэмэгдлийн талаар Эрчим хүчний сайд Б.Чойжилсүрэнгээс тодрууллаа. Тэрбээр,  "Эрчим хүчний реформ хийхийн тулд хамтарсан Засгийн газар байгуулсан. 2024 оны 11 дүгээр сарын 15-наас эрчим хүчний үнэ тарифыг өртөгт нь ойртуулах арга хэмжээг авч хэрэгжүүлсэн. Миний хувьд бодит байдлаа нуулгүй асуудлаа шийдээд явъя гэсэн байр суурьтай. Ингээд шийдвэр гаргаад цахилгааны үнэ нэмсэн. Мөн дулааны үнийг нэмэгдүүлэх шийдвэр гаргаад 5 дугаар сарын 16-наас мөрдөж эхлэх ёстой байсан. Иргэдийн ахуйн хэрэглээний метр квадрат тутмыг 100 хувь, ААН-ийг дунджаар 85 хувь нэмэгдүүлэх шийдвэр гаргасан байсан. Харамсалтай нь  инфляцийн зорилтот түвшин даваад 2 оронтой тооруу орчих гээд байгаа учраас Ерөнхий сайд болон бусад сайд нарын хүсэлтээр дулааны үнийг нэмэх шийдвэрийг хойшлуулахаар болоод байгаа. Ямар ч байсан 2025 оныг дуустал уг шийдвэрийг хойшлуулсан. Үндсэндээ 10 төгрөгөөр үйлдвэрлээд 4 төгрөгөөр борлуулж байна. Үйлдвэрлэлийн өртгөөс 2.5 дахин хямд борлуулаад олон жил явснаас шалтгаалаад ужиг хүндрэлүүд гарчихаад байгаа юм. Мэдээж цахилгааны үнэ тариф нэмэгдсэн учраас хэрэглэгчдийн дунд бухимдал байгааг үгүйсгэхгүй. Гэхдээ сонгууль дууссан, ард түмнийг хоосон амлалтаар цатгаад яваад баймааргүй байна" гэлээ.