Б.Пүрэвдорж: Ахмадуудын тэтгэвэр цахилгааны төлбөрт яваад дуусаж байна

УИХ-ын гишүүн Б.Пүрэвдоржоос цахилгааны үнийн нэмэгдлийн талаар тодрууллаа. Тэрбээр, "Төрийн өмчийн томоохон компаниуд дээр суудаг, тонон дээрэмддэг хүмүүс, мөн эрчим хүчний компаниудруу шахаа хийдэг луйварчингууд цахилгааны үнэ өсөхөд нөлөөлж байна. Эхлээд энэ авлигын мөсөн уулыг арилгах ёстой. Тэгэж байж үнэ нэм гэж шаардсан. Харамсалтай нь тэр үгийг үл тоож, авлигын мөсөн уултай тэмцэлгүй шууд үнэ нэмсэн. Энэ горыг ард түмэн үүрч байна. 200 мянган төгрөгийн цахилгааны үнэ төлдөг байсан айл өрх 800-900 мянган төгрөг төлж байна. Төлбөр нэмэгдэх тусам авлигчдын улам их хулгайлах хөрс суурийг бэлдэж байна. Тийм учраас энэ асуудлыг маш яаралтай шийдэх ёстой. Энэ үнийн нэмэгдлээс болоод залуучуудын цалин хүрэхгүй  хэд хэдэн аппликейшнээс зээл авч, ахмадууд нь хамаг тэтгэврээрээ цахилгааны үнийг төлж байна. Монголын ард түмэн хохирч байна. Тийм учраас энэ хохирлыг бууруулах, үнийг багасгахын тулд авлигчидтай нь тэмцэх л хэрэгтэй" гэв.