Олон улсын театрын өдөр тохиож байна

Жил бүрийн гуравдугаар сарын 27-ны өдрийг 1962 оноос хойш “Олон улсын театрын өдөр” болгон тэмдэглэдэг уламжлалтай. Энэхүү өдрийг ЮНЕСКО-гийн харьяа Олон улсын театрын институт санаачилсан байдаг. Уран бүтээлчид, жүжигчид, найруулагчид болон үзэгчид жил бүр театрын урлагийн үнэ цэнийг хүндэтгэн тэмдэглэдэг. Энэ өдөр бол дэлхийн өнцөг булан бүрд буй театрын урлагийн уран бүтээлчид хийгээд театрын урлагийн үнэнч үзэгч хэн бүхний баярын өдөр юм.

Монгол Улсад 1990-ээд оноос энэ баярыг тэмдэглэдэг болж, тухайн жилдээ туурвисан шилдэг бүтээлүүдээ үзэгч түмэндээ толилуулж үзэсгэлэн, уралдаан зохион байгуулж, уран бүтээлчид тайлангаа тавьдаг, хүн бүрийн хүсэн хүлээдэг өвөрмөц гэгээлэг баяр болсон билээ.

Эл өдөр дэлхийн урлагийн театрууд үзэгчдэдээ тоглолтоороо бэлэг барьдаг. Тэгвэл УДЭТ-ын уран бүтээлчид Соёл судлалын “Эрдэнийн очир” нийгэмлэгтэй хамтран Дэлхийн театрын өдрийг тохиолдуулан “Театрын өчигдөр ба өнөөдөр” үзэсгэлэнг өнөөдөр олонд дэлгэх гэж байна. Мөн “Хайлаас модны дор чамайг хүлээнэ” жүжгээр үзэгчдэдээ бэлэг барьж байгаа юм.