Л.Мөнхбаясгалан: Ухаа худгийг хууль бусаар авсан асуудлаар УИХ дээр дэд хороо байгуулна

УИХ-ын гишүүн Л.Мөнхбаясгалан “Энержи Ресурс” компанитай холбоотой асуудлаар мэдээлэл өглөө.

Тэрбээр “Би УИХ-ын 7 дугаар тойрог буюу говийн бүсээс сонгогдсон гишүүний хувиар мэдэгдэл хийж байна. Говийн бүсэд Монгол Улсын сангийн авдрыг дүүргэдэг стратегийн томоохон ордууд байдаг. Зөвхөн Өмнөговиос гэхэд 1.7 их наяд төгрөгийг улсын төсөвт төвлөрүүлэхээр болсон.

Би 28 жилийн турш эрэн сурвалжлах сэтгүүлч байхдаа Монголын олигархуудын эсрэг чиглэсэн баримтуудыг цуглуулж, тэдэнтэй тэмцэж ирсэн. Эдгээр нь сүүлийн 15 жилийн турш сэтгүүлчийн хүрээнд цуглуулсан баримтууд. Оюутолгой, Тавантолгой, Энержи Ресурс, Ухаа худаг, Мак, Петровис, Эрдэнэтийн 49 хувь, ХХБ, Төрийн банк гэх мэт банкнуудын хувьчлалтай холбоотой баримтууд.Засгийн газар Энержи Ресурс ХХК Ухаа худгийг луйвраар авсан гэж мэдэгдээд УИХ руу тогтоолын төсөл оруулсан. Надад энэ талаар олон баримт байсан, хэн ч тоогоогүй. Харин одоо тоож байна. Ийм учраас Засгийн газрын байр суурийг дэмжиж, УИХ-д хянан шалгах дэд хороо байгуулж ажиллахын тулд манлайлж ажиллана.  

Энэ хүрээнд албан бичигт гарын үсэг цуглуулах ажиллагааг эхлүүлнэ. 32 гишүүн зурах ёстой. Хамгийн түрүүнд өөрийн сонгогдсон Ардчилсан намын гишүүдэд хандана.

Энержи Ресурс 2009-2021 он хүртэл илүү АМНАТ төлсөн гэдгээр Засгийн газрын тогтоолыг хүчингүй болгох гэж шүүхэд өгсөн. Өнөөдөр нүүрсний зах зээлд үйл ажиллагаа явуулж буй бүх ААН АМНАТ төлдөг. Харин ганцхан Энержи Ресурст хамаагүй гэж байна. Тус компанид ямар хуулиуд үйлчилдэггүй гэдгийг бид мэдэх ёстой.

Энержи Ресурс хууль зөрчсөн үү, хулгай хийсэн үү гэдгийг тодорхой болгож, нэг тийш нь шийдэх ёстой. Миний бодлоор өөрсдөдөө зориулсан хууль тогтоомж гаргаад хулгай хийсэн гэж бодож байна” гэв.