Нэгдүгээр ангийн хүүхдүүдийг нүд, шүд, зүрхний эмгэг илрүүлэх үзлэгт хамруулна

Аливаа өвчлөлөөс урьдчилан сэргийлэх, өвчлөлийг эрт илрүүлж эмчлэх зорилгоор иргэдийг эрт илрүүлэг, үзлэг шинжилгээнд хамруулах ажлыг улсын хэмжээнд зохион байгуулсан. Энэ оноос эхлэн хүн бүрийг бус зорилтот бүлгийн хүрээнд уг ажлыг үргэлжлүүлэн зохион байгуулахаар болсон. Тодруулбал, ЭМЯ-наас “Эрт илрүүлэг 2.0”-ыг үргэлжлүүлэх шаардлагатай гэсэн зөвлөмж гарсан. "Эрт илрүүлэг 2.0"-ыг ургийн хромосомын гажгийн, нярайн, сургуульд суурилсан, ажлын байранд суурилсан, хорт хавдрын гэсэн таван чиглэлээр зохион байгуулах юм байна.

Өнгөрсөн хугацаанд үзсэн үзлэгээр хүүхдүүдийн дунд шүд, амны хөндийн өвчлөл, жингийн илүүдэл болон дутагдал зонхилж байна гэсэн дүгнэлт гарсан байна. Энэ хүрээнд ерөнхий боловсролын нэгдүгээр ангийн хүүхдүүдийг нүд, шүд, зүрхний эмгэг илрүүлэх үзлэгт хамруулж байгаа юм. 

Орон нутагт дөрөвдүгээр сарын 1-нээс эрт илрүүлгийн үзлэгийг эхлүүлэхээр бэлтгэл ажлыг хангаж  байна. Нийслэлийн нэгдүгээр ангийн сурагчдын 80 гаруй хувийг нүд, шүд, зүрхний эмгэг илрүүлэх үзлэгт хамруулж шаардлагатай хүүхдүүдийг дараагийн шатлалын үзлэг, эмчилгээнд хамруулаад байгаа ажээ. Өнгөрсөн оноос эхлэн эрт илрүүлэгт хүн бүрийг хамруулахгүй, зорилтот хүмүүсийг хамруулж байгаа талаар дээр мэдээлсэн. Энэ хүрээнд дөнгөж төрсөн нярайг зургаан төрлийн үзлэг, илрүүлэгт хамруулахаар мөн бэлтгэл ажлыг хийж байгаа аж. Илрүүлээд орхидог бус эмчилгээ шаардлагатай хүмүүсийг бүрэн эмчлэх нь чухал тул энэ чиглэлийг баримталж ажиллаж байгаа ажээ. Боловсролын сайд, Эрүүл мэндийн сайдын хамтарсан тушаал гарсан энэ хүрээнд хүүхдүүдийн үзлэг, эмчилгээ нэлээд үр дүнтэй байгааг албаныхан онцоллоо.