Х.Нямбаатар: Надад 1 тэрбум төгрөг байхгүй. Хэн нэгнээс уучлалт гуйх шаардлагагүй

Нийслэлийн Засаг дарга Х.Нямбаатар цаг үеийн асуудлаар сэтгүүлчдэд мэдээлэл өглөө. Тэрбээр "Нэгдүгээрт шүүхийн ямар ч тогтоол гараагүй. Шүүгчийн захирамж гаргаж,  "Эко машин үйлдвэрлэгчдийн холбоо" бидний нэр төрд халдсан гэх үндэслэлээр шүүхэд нэхэмжлэл гаргасан юм байналээ.  Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн шүүгч нэхэмжлэлийн дагуу иргэний хэрэг үүсгэсэн захирамж гаргасан байна лээ. Захирамжтай холбогдуулан шүүхийн урьдаас гарах шийдвэрийн биелэлтийг баталгаажуулах зорилгоор надтай холбоотой битүүмжлэл гаргах захирамж гаргасан байналээ. Надад бол нэг тэрбум төгрөг байхгүй.  Нэг тэрбумын эд хөрөнгө ч байхгүй. Хэвлэлээр нэг тэрбум төгрөг гаргуулах гэж байна гэсэн мушгисан юм явж байналээ. Шүүгчийн гаргасан шийдвэрт гомдол гаргасны дагуу  маргааш 14 цагаас гомдол хэлэлцэхээр байгаа. Би хэн нэг хүнээс уучлалт гуйх шаардлагагүй. Яагаад гэвэл Улаанбаатар хотын замын хөдөлгөөний нөхцөл байдал ямар байгааг та бүхэн сайн мэднэ. Жилдээ 130-140 мянган автомашин импортоор орж ирж байна. 80 мянган авто машин зорчих боломжтой зам дээр 10 дахин их машин зорчиж байна. Импортлож байгаа хүмүүсийн хувьд хэд хэдэн зөрчлүүд гаргаж байгаа. Тухайлбал, татвар төлдөггүй, Монгол улсын чанар стандарт хангахгүй тээврийн хрэгсэл оруулж ирдэг, дээр нүүрсэн яндангүй машин оруулдаг, өнгөрсөн 2024 оны 11 дүгээр сард хотын дугаар олгохыг зогсоосонтой холбоотой улсын дугаарын бизнес цэцэглэж байна.  Тиймээс өнөөдөр АТГ-т бичиг өгчихөөд ирж байна. Тэр бичиг нь Улаанбаатар хотын замын хөдөлгөөнд оролцохдоо автомашины үзлэг оношилгоонд ороогүй олон тооны  дугаарууд хаанаас гарч ирсэн бэ. Өөрөөр хэлбэл авто машины дугаар авахад заавал татвараа төлж, үзлэгт орсон, даатгал хийлгэсэн байх ёстой. Энэ дээр Авто тээврийн үндэсний төв болон Авто тээврийн оношилгооны төвүүд хүчингүй болсон дугааруудыг сэргээж, дугаарын шагийн бизнес хийж байна уу гэх хардлага байгаа. Тодорхой баримтууд бий энэ дагуу АТГ шалгаж өгнө үү гэх хүсэлтээ тавьсан" гэв.