П.Наранбаяр: Хүүхдүүдийн 87 хувь нь ямар нэг хэлбэрийн цахим халдлагад өртсөн

Олон нийтийн цахим сүлжээнд 16 хүртэлх насны хүүхдүүдийн оролцоог зохицуулах судалгаа эхлүүлсэн талаар өнөөдөр Боловсролын сайд П.Наранбаяр мэдээлэл хийлээ. 

Боловсролын сайд П.Наранбаяр: " 2024 оны арваннэгдүгээр сарын 29-нд Австрали улс цахим орчинд, ялангуяа Фэйсбүүк, Твиттер, Снапчат, ТикТок зэрэг олон нийтийн сүлжээнд 16 хүртэлх насны хүүхэд орохыг хориглох заалттай хууль баталсан нь дэлхий нийтийн анхаарал татсан. Энэхүү хуулийг судлах, үр нөлөөг нягтлахын зэрэгцээ Монгол Улсад дээр дурдсан олон нийтийн сүлжээнд 16 хүртэлх насны хүүхэд орохыг хязгаарлах хуулийн заалт оруулж ирэхээр дээрх ажлын хэсэг судалгаагаа эхлүүллээ. Суурь шинжтэй өөрчлөлт хийхийн тулд судалгаа маш их шаардана. Нийгмийн хүрээнд ярилцаж, хэлэлцэн зөвшилцөлд хүрэх нь зүйтэй. Эрх ашиг нь хөндөгдөж байгаа нийгмийн бүх бүлэгтэй бид  ярилцана. Доороос нь дээш нь хэлэлцэх аргаар явна. Бид үр дүнд хүрэх ёстой. Бэлтгэлээ хангахаар Боловсролын Яам ажиллаж эхэлсэн" гэлээ. Мөн "Фэйсбүүк, Твиттер, Снапчат, ТикТок зэрэг сүлжээнд зохисгүй агуулга явах, хүүхэд насанд тохироогүй байдалд уруу татах, хүүхдүүдийн хооронд цахим дээрэлхэлт үүсгэх гэх мэтчилэн олон асуудал гарч байна. Үүнээс хүүхдээ хамгаалах нь бидний үүрэг. Түүнчлэн цахим орчинд соёлтой зөв харилцаж сурах нь нийгэмд нэн шаардлагатай байгаа талаар хэлж байна. 

Манай улс 2020 онд цахим орчин дахь хүүхдийн аюулгүй байдлын үндэсний суурь судалгааг хийж байжээ. Ингэхэд эцэг эхчүүдийн 91 хувь нь хүүхдүүдээ цахим орчинд халдлагад өртөж  байгаагүй гэсэн ойлголттой байсан бол хүүхдүүдийн 87 хувь нь ямар нэг хэлбэрийн цахим халдлагад өртсөн гэж хариулжээ. Тэдний 60 хувь нь эцэг эхдээ хэлээгүй байна.