Иргэн Ц.Амарзаяа: Угаарын хийн хордлогод ээж, дүү хоёроо алдсан

Маш олон газар өргөдөл бичсэн. Тухайн үеийн ерөнхий сайд байсан У.Хүрэлсүх, Хотын дарга байсан С.Амарсайхан, Эрүүл мэндийн сайд Д.Сарангэрэл, Ерөнхийлөгч Х.Баттулга гэхчлэн өргөдөл өгөөгүй хүн үлдээгүй. Өнгөрсөн долоо дугаар сард ээж минь өөд болсон. Үхлийн шалтгааныг өвчний улмаас гэж хэлсэн. Манай ээж яг ургамал шиг ухаангүй, юу ч хийж чадахгүй 4.8 жил зовсны эцэст нас барсан. Тэр хооронд би ээжийгээ гардан асарсан. Энэ хугацаанд төрийн байгууллагуудад хандан 15 өргөдөл гаргаж байсан. Эрүүл мэндийн сайдад ээжийгээ жилд хоёр удаа эмнэлэгт хэвтүүлдэг байх хүсэлт гаргасан ч үгүй гэдэг хариу авсан. Шүүхэд хоёр удаа өргөдөл гаргасан ч материал дутуу гээд буцаасан. Манай ээж, дүү хоёр шиг утаанаас болж амь насаараа хохирсон хүмүүсийн амийг хэн хариуцахыг асуух гэж энэ удаагийн сонсголд оролцож байна.