Х.Баасанжаргал: Гуравдугаар сард морин уралдаан чинь болох боломжгүй

Хаврын уралдааныг зохион байгуулах эсэх асуудлыг орон нутгийн удирдлагууд шийднэ гэх Засгийн газрын шийдвэр гарсантай холбогдуулан УИХ-ын нэр бүхий эмэгтэй гишүүд мэдээлэл хийлээ. Энэ үеэр УИХ-ын гишүүн Х.Баасанжаргал, "Засгийн газрын өнөөдрийн шийдвэр олон улсын өмнө Монгол Улс шүүхийн шийдвэр дагаж мөрддөггүй гээд зарлачихлаа. Хүний эрхийн Үндэсний Комисс, Хүний эрхий байгууллагууд хүүхдийн эрхийн эсрэг зөрчил, буруу зүйл гэдгийг үе үеийн Засгийн газартай мэдэгддэг байсан. Өнөөдөр бид ингээд зогсож байгаа нь 20 жилийн ухарсан явдал. 

Хаврын уралдааныг зохион байгуулах нь зөвхөн хүүхдийн эрүүл мэнд, амь насны асуудал биш. Сурч боловсрох эрхийн асуудал юм. Хөдөөгийн иргэдийн боловсрол, хөгжлийн асуудал юм. Энэ асуудал жендерийн эрх тэгш байдалтай холбоотой, хүний эрхийн суурь зарчмын асуудлыг хөндөж байгаа юм. 

Өнөөдөр Засгийн газрын тогтоол гарахад сайдын зүгээс тайлбарлаж байгаа нэг зүйл нь, "Тэртээ тэргүй нууцаар болж байгаа уралдааныг харин ч бид ил тод, хяналттай болголоо" гэсэн. Төр яагаад хийж чадахгүй байгаа ажлаа иргэдийн нуруун дээр үүрүүлж байгаа юм, төр өөрөө хяналт тавих ёстой. Төр өөрөө хяналт тавьж чадахгүй за яахав яахав гээд ийм төр байдаг юмуу. Ийм ичгэвтэр төр байж болдог юмуу. Төр өөрөө хариуцлагаа хүлээх ёстой гэж харж байна" гэсэн юм. 

М.Нарантуяа-Нара: Хаврын морин уралдаан зохион байгуулах эсэх шийдвэрийг орон нутагт нь өгчихлөө. Боломжийг нь нээж өгчихөөд, хариуцлагыг өөрсдөөсөө холдуулсан шийдвэр гэж харж байна.