Утааны сонсголын урьтал болгож гурван сэдвээр дэд хэлэлцүүлэг хийнэ

Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсгийн гишүүд мэдээлэл хийлээ. УИХ-ын гишүүн Ж.Чинбүрэн,  "Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсэг хуралдаж, сонсгол явуулах өдрөөс өмнө дэд хэлэлцүүлэг хийх товыг баталсан. Агаарын бохирдол, утаа ба хүн амын эрүүл мэнд гэх сэдвээр нэг дэд хэлэлцүүлэг хийнэ. Хоёрдахь дэд хэлэлцүүлгийн сэдэв нь, эрх зүйн орчин, бодлогын баримт бичиг, шийдвэрүүдийн үр дүн, төсвийн зарцуулалт байна. Мөн зуух түлшний технологи гэсэн сэдвээр гурав дахь хэлэлцүүлгийг хийнэ. Долоо хоног бүрийн лхагва гарагт 14:00-18:00 цагийн хооронд дэд хэлэлцүүлгийг хийнэ. Бид оролцох хүсэлтэй иргэдийн саналыг авсан. Энэ долоо хоногийн лхагва гарагт "Агаарын бохирдол ба эрүүл мэнд" сэдвээр хэлэлцүүлэг хийнэ. Бодитой судалгаа, мэдээллийг та бүхэнд сонсгоно. Монголын эрдэмтнийн хийсэн тоймыг хүргэх юм. Агаарын бохирдол бүрэлдэж байгаа ургийн өсөлтөд хамгийн түрүүнд нөлөөлж, дутуу төрөлт, дутуу бойжилттой холбогддог. Урт хугацаандаа хорт хавдар үүсгэх нөхцөл үүсгэж байгаа эсэх талаар мэдээлэл сонсоно. Эхний сонсголыг УИХ-ын гишүүн С.Эрдэнэболд ахална. Дараагийн хэлэлцүүлэг ирэх долоо хоногийн лхагва гарагт болно. Мөн өдөр "Зуух, түлшний хяналт, стандартын асуудал" сэдээр хийх бөгөөд хэлэлцүүлгийг УИХ-ын гишүүн З.Мэндсайхан даргалж явуулна. Харин гурав дахь дэд хэлэлцүүлэг "Эрх зүйн орчин" санхүү, хариуцлага" сэдвээр явуулна. Энэ бол маш өргөн хүрээтэй, чухал сэдэв. Энэ хэлэлцүүлгийг УИХ-ын гишүүн Б.Баярбаатар ахалж, явуулна" гэв.