Жолоочийн албан журмын даатгалын хэмжээг өсгөсөн тогтоолыг хүчингүй болголоо

Жолоочийн албан журмын даатгалын хувь хэмжээ итгэлцүүр нэрээр нэмэгдсэн шийдвэр нь үндсэн хуульд заасан иргэдийг нас хүйс, хөрөнгө, нийгмийн гарал үүслээр ялгаварлан гадуурхахгүй гэсэн зүйл заалтыг зөрчсөн гэж үзлээ. Санхүүгийн зохицуулах хорооноос гаргасан шийдвэрээр 18 настай жолооч өөр тарифаар, 65 настай хүн бас нэг тарифаар даатгуулна гэх мэтээр нас хүйс ангилан тусгажээ. Тийм учраас Санхүүгийн зохицуулах хорооноос гаргасан энэ шийдвэрийг Хууль зүй дотоод хэргийн яам бүртгэхээс татгалзаж буцаасан байна. Ингэснээр даатгалын үнэ нэмэгдэхгүй, хуучин журам мөрдөгдөнө. Харин нэмэгдсэн тарифаар даатгуулсан иргэд мөнгөө нэхэмжилж буцаан авч болохыг Хууль зүй дотоод хэргийн сайд О.Алтангэрэл хэллээ.