Үндэсний бөхийн барилдааныг NTV телевиз онцгой бүрэн эрхтэйгээр шинэ форматаар дамжуулна

Монголын Үндэсний бөхий холбоо “Монгол Үндэсний бөх-Бидний үе дамжсан өв соёл,Үндэсний бахархал” шинэчлэлийн аяныг эхлүүлж байна. Энэхүү аяны хүрээнд Үндэсний бөхийн өргөө 365 хоногийн турш байнгын ажиллагаатай байж, зөвхөн Монгол үндэсний бөх төдийгүй өв соёлын төв болох алсын хараагаа тодорхойлжээ. Мөн бөхийн барилдаан үзэхээр ирсэн хамт олон, үзэгчид тав тухыг мэдрэх, бөхчүүд өргөөндөө зөвхөн барилдах гэж ирэх биш, хамтдаа цуглах, боловсрох, өв соёлоо түгээдэг байх бодлогын өөрчлөлтүүд багтсан аж. Шинэчлэлийн аяны хүрээнд бөхийн барилдааны нэгдсэн цаглавар системтэй болсноор үзэгчид бөхийн өргөөний барилдааны чансаа тогтоох системтэй болох бөгөөд энэ ажлын үр дүнд бөхчүүдийн бэлтгэл чанаржих давуу талтай юм. Энэхүү шинэчлэлийн гол хамтрагч нь NTV телевиз байх бөгөөд 18 жилийн түүхтэй тус телевиз Монгол бөхийн өргөөнд болж буй барилдаан бүрийг онцгой бүрэн эрхтэйгээр дамжуулахаар болжээ. Монголын Үндэсний  бөхийн холбоо орчин үеийн спортыг хөгжлийн чиг хандлагын дагуу телевизийн дамжуулалтын онцгой эрхийн сонгон шалгаруулалтыг 2024 оны есдүгээр сард зарласан байна. Энэ сонгон шалгаруулалтад өргөн нэвтрүүлгийн олон телевиз оролцсоноос NTV телевиз шалгарчээ. Ийнхүү уламжлалт бөхийн барилдааныг үзэгчдэд үнэ төлбөргүй, дуу дүрсний өндөр чанартай,шинэ форматаар хүргэхээс гадна бөх сонирхогчид уран хурц барилдааныг шимтэн үзэх боломж нээгдэж байна.  Энэ ажлыг баталгаажуулж “Монголын Үндэсний Бөхийн холбоо”-ны тэргүүн Ц.Магалжав  “Медиа групп” ХХК-ийн гүйцэтгэх захирал А.Баярбат нар хамтран ажиллах санамж бичигт гарын үсэг зурлаа.