ЗЭС ФЕСТИВАЛЬ: “Монгол зэс” үзэсгэлэн худалдаа маргааш Соёл урлагийн цогцолборт гарна

Орхон аймаг, Эрдэнэт хот дотоодын аялал жуулчлалыг хөгжүүлж, уул уурхайн салбараа сурталчлах  зорилгоор “Зэс фестиваль-ийг хоёр дахь жилдээ зохион байгуулж байна.  Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарласан.  Энэ хүрээнд Орхон аймаг  орон нутгийн төдийгүй, Монгол Улсын нэрийн хуудас болох арга хэмжээг “Зэс фестиваль” гэж үзэж буй. 

Энэ жилийн  “Зэс фестиваль” Эрдэнэт хотын өдөр болон Анхдагч илгээлтийн эздийн өдөр болж буйгаараа онцлогтой.  Орхон аймагт 5000 гаруй аж ахуйн нэгж үйл ажиллагаа явуулж байгаагаас  уул уурхайн чиглэлээр үйл ажиллагаа явуулдаг таван аж ахуйн нэгж бий. 

Тодруулбал, зэс молибдены хүдрийн олборлолт, баяжуулалтаараа Ази тивдээ төдийгүй дэлхийд томоохонд тооцогддог, жилд 39,6 сая тонн хүдэр олборлон, 37,2 сая тонн хүдэр боловсруулж 569 мянган тонн зэсийн баяжмал, 470  мянга орчим тонн молибдены баяжмал үйлдвэрлэдэг “Эрдэнэт үйлдвэр" ТӨҮГ, Зэс боловсруулах үйлдвэрлэлээр улсдаа тэргүүлэгч, байгальд сөрөг нөлөө багатай, дэвшилтэт техник, технологи ашиглан үүсмэл ордын хүдрийг боловсруулан, жилд 10 мянган тонн катодын зэсийг гидрометаллургийн аргаар ялгах хүчин чадалтай, дэлхийн жишигт нийцсэн зэс үйлдвэрлэж буй “Ачит Ихт” ХХК,  жилд 2,5 тонн цэвэр зэс үйлдвэрлэж зэс утас, цахилгааны утас үйлдвэрлэдэг Монгол-Америкийн хамтарсан “Эрдмин” ХХК, байгаль орчинд ээлтэй гидрометаллургийн технологийг ашиглаж жилдээ 10 мянган тонн цэвэр катодын зэс боловсруулах хүчин чадалтай “Зэс эрдэнийн хувь” ХХК, “Гал сэнтий” ХХК зэрэг томоохон уул уурхайн үйлдвэрүүд үйл ажиллагаа явуулж байна. 

Уламжлал ёсоор “Зэс фестиваль”-д  зэс боловсруулах үйлдвэрүүдээс гадна зэсээр эцсийн бүтээгдэхүүн үйлдвэрлэдэг иргэн, аж ахуйн нэгж байгууллагын бүтээгдэхүүн, зэс эдлэлийн  “МОНГОЛ ЗЭС” үзэсгэлэн худалдаа энэ сарын 10,11-нд 10:00-17:00 цагт Соёл урлагийн цогцолборт гарна.  Мөн 11-нд “Есөн эрдэнийн хурим” үлгэр жишээ  9 гэр бүлийн гэрлэх ёслолын арга хэмжээ (Хуримын ордон)-д 10:00-19:00 цагт,  “Эрдэнэтийн цагаан шөнө” урлагийн тоглолт 19:30-23:00 цагт болно. 

Аймгийн нийгэм, эдийн засгийн хөгжилд чиглэсэн 20 гаруй хөтөлбөрийг хэрэгжүүлж байгаагийн нэг нь “Аялал жуулчлалыг хөгжүүлэх хөтөлбөр” бөгөөд “Баян-Өндөр хайрхан” аялал жуулчлалын цогцолборыг байгуулах, Эрдэнэтийн угтах хаалга орчмын түр буудаллах цэгүүдийн тохижуулах зэрэг ажлуудыг эхлүүлээд байна.