СБД-ИЙН ИТХ-ЫН ДАРГА Х.НЯМДАГВА ДҮҮРГИЙН ЦАГДААГИЙН ГАЗРЫН ҮЙЛ АЖИЛЛАГААТАЙ ТАНИЛЦЛАА

Сүхбаатар дүүргийн ИТХ-ын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Х.Нямдагва өнөөдөр дүүргийн Цагдаагийн газар болон Цагдаагийн 1 дүгээр хэлтсийн үйл ажиллагаатай танилцлаа.

Энэ үеэр дүүргийн Цагдаагийн газрын дарга, Цагдаагийн хурандаа Г.Давааням нийслэлийн хэмжээнд Сүхбаатар дүүргийн Цагдаагийн газраас анхлан хэрэгжүүлж буй Гэмт хэрэг, зөрчлийг шалгах, гамшиг осол, эмнэлгийн яаралтай тусламж, үйл ажиллагаанд дэвшилтэт технологи нэвтрүүлэх, бодит цаг хугацааны хяналт хийх, гамшиг осол болсон газар, эмнэлгийн яаралтай тусламж, гэмт хэрэг, зөрчлийн газрын дүрсийг шууд дамжуулах, нэгдсэн удирдлагаар хангах зорилгоор цагдаагийн эргүүлийн авто машины урдах болон дотор хэсгийн бичих хар хайрцаг, энгэрийн камер бүхий цогц удирдлагын системийг танилцууллаа. Тус тоног төхөөрөмжийг цагдаагийн газрын 1,2 дугаар хэлтсийн эргүүлийн 14, Шуурхай удирдлагын тасгийн 2, нийт 16 тээврийн хэрэгсэлд суурилуулан ажиллаж байна.

Мөн Цагдаагийн 1 дүгээр хэлтсийн дарга, Цагдаагийн хурандаа Н.Батбаяр 2024 оны эхний 10 сард хийж хэрэгжүүлсэн ажлаа танилцуулж дүүргийн хэмжээнд эхний 10 сарын байдлаарх гэмт хэрэг, зөрчлийн талаар танилцууллаа.

Цагдаагийн газрын удирдлагуудын зүгээс Цагдаагийн газрын 1, 2 дугаар хэлтэс, Замын цагдаагийн хэлтэст нийт 16 мэдүүлэг авах уулзалтын өрөөг засварлан тохижуулж хяналтын камер, тоног төхөөрөмжийг шийдвэрлэхээс гадна дүүргийн 13 дугаар хорооны нутаг дэвсгэрт “Теле камерын хяналтын дэд төв”-ийг байгуулахаар дүүргийн төсөвт тусган шийдвэрлэсэнд ИТХ болон Засаг дарга нарт талархаж байгаагаа илэрхийллээ. ИТХ-ын дарга Х.Нямдагва гэмт хэргээс урьдчилан сэргийлэх чиглэлээр дүүргийнхээ хууль хүчний байгууллагууд, цагдаагийн газрын үйл ажиллагааг үргэлж дэмжиж ажиллах болно.

Иргэдийнхээ тав тухтай амар тайван амьдралын төлөө хамтдаа хичээж, ажиллах болно гэдгийг онцоллоо.