Д.Цогтбаатар: Мөрдөн байцаах ажиллагаанд хүний эрхийн комиссыг оруулдаг болно

УИХ-ын Хууль зүйн байнгын хорооны өнөөдрийн хуралдаанаар Эрүүдэн шүүлт тулгах, хүнлэг бус, хэрцгий хандахаас ангид байх хүний эрхийн хэрэгжилт хяналтын сонсголын тайланг явуулсантай холбогдуулан авах зарим арга хэмжээний талаар Байнгын хорооны тогтоолыг хэлэлцлээ.

Хууль хүчний байгууллагад шалгагдаж байгаа иргэд болон цэргийн алба хааж байгаа хугацаат цэргийн албан хаагч нь эрүүдэн шүүлт болон дэглэлт зэрэгтэй тулгарч хохирч буй асуудлаар Хууль зүйн байнгын хорооноос нээлттэй сонсгол хийсэн. Үүнтэй холбогдуулан тогтоол батлахаар болжээ.

УИХ-ын Хууль зүйн байнгын хорооны дарга Д.Цогтбаатар: Урьдчилан саатуулах 461 дүгээр анги дээр хүүхдийн амь хохирсон асуудал гарангуут ХЭҮК-тай ярьж байгаад мөрдөн байцаах ажиллагаанд ХЭҮК-ын гишүүдээс оруулдаг болохоор ажиллаж байна. Тэгэхгүй бол өнөөдөр хэрэгжиж байгаа хуулиар хүний эрхийн зөрчил гарахыг хүлээгээд байгаа. Хууль гэдэг  хүний эрхийн зөрчил гаргахгүй төлөө явж байх учиртай учраас хуулийн төслийг боловсруулаад явж байна, Удахгүй өргөн барина.