УОК: Сайжруулсан шахмал түлшийг гаднын лабораторид шинжлүүлэхийг даалгав

Улсын онцгой комиссын хурлаас гаргасан шийдвэрийг нарийн бичгийн дарга Т.Баярхүү танилцууллаа. Тэрээ "Өнөөдрийн хуралдаанаар өвөлжилтийн нөхцөл байдал болон Улаанбаатар хотын агаарын бохирдлын асуудлыг хэлэлцэж, холбогдох хүмүүст чиглэл өглөө. Өвөлжилтийн нөхцөл байдлын тухайд, зарим аймгийн сумдад зудын нөхцөл байдал үүссэн. Тиймээс аймаг, сумдын малчин өрхийн иргэдтэй уулзсан.  Нийслэлийн агаарын бохирдол нэмэгдэж байгаатай холбоотойгоор хотын даргаар ахлуулсан ажлын хэсэг байгуулахаар боллоо. Мөн ЗГХЭГ-ын даргад агаарын бохирдлыг бууруулах үндэсний хороог сэргээн байгуулах чиглэл өглөө. Үүнээс гадна нийслэлийн агаарын чанарыг сайжруулах хяналт шалгалтын ажлыг эрчимжүүлнэ. Нийслэлийн 2500 төрийн алба хаагч айл өрхүүдээр шалгалт явуулж, угаарын хийн хордлогоос сэргийлэх зөвлөгөө өгөх юм. Түүнчлэн Эрчим хүч болон Байгаль орчин уур амьсгалын өөрчлөлтийн сайд, Нийслэлийн Засаг даргад агаарын бохирдлыг бууруулах дунд, урт хугацааны нарийвчилсан төлөвлөгөөг боловсруулж танилцуулна. Сайжруулсан шахмал түлшинд хөндлөнгийн буюу гадаадын лабораториор шинжилгээ хийлгэж, үр дүнг УОК-т танилцуулах хугацаатай үүрэг өглөө" гэж мэдээлэв.