УИХ-ын гишүүн М.Мандхай: Евразийн худалдааны гэрээнд нэгдэхийг эсэргүүцэж байна

Евразийн худалдааны гэрээ үзэглэх асуудал засгийн газрын түвшинд яригдаж байгаатай холбогдуулан үйлдвэрлэгчид болоод эдийн засагчид эсрэг байр суурь илэрхийлсээр байгаа. Энэ хүрээнд өнөөдөр УИХ-ын гишүүн М.Мандхай байр сууриа илэрхийллээ. Тэрбээр:  "Манай байнгын хороо худалдаа эрхлэгчдийн төлөөллүүдтэй уулзсан. Манай хүнс, хөдөө аж ахуйн түүхий эдийн ихэнх нь ОХУ-аар дамжин орж ирж байгаа. Тэр дундаа газар тариалан эрхэлж байгаа бизнес эрхлэгчид Газпромоор дамжин худалдан авалтаа хийдэг байсан. Гэтэл арваннэгдүгээр сараас эхлэн энэ нь зогссон. Энэ нь олон улсын санхүүгийн салбар тус худалдааны гэрээтэй холбоотой асуудалд сануулах арга хэмжээ өгч байгаа юм болов уу гэх мэдээлэл ч явж байна. Иймд бизнес эрхлэгчид бид худалдан авалтаа хийж чадахгүй байна гэдэг зүйлийг ярьж байна. Бид дөнгөж үйлдвэрлэгч нараа бойжуулж босгож байтал хөдөө аж ахуйн 74 төрлийн импортын бүтээгдэхүүнийг тэглэх нь сөрөг нөлөөтэй. Хоёрдугаарт үндэсний аюулгүй байдалд халтай гэж үзэж байна.Олон талаас нь сайн судалж харж байж, гэрээг үзэглэх асуудлыг ярих ёстой гэж бодож байна. Энэ гэрээг түр хойшлуулах ёстой гэж хувь гишүүний байр суурьтай байна" гэв.