12 дугаар сард цаг агаар ямар байх вэ?

Арав хоногт нэг удаа хийдэг хээрийн цасны хэмжилтийн мэдээгээр 12 дүгээр сарын 10-ны байдлаар нийт нутгийн 50 гаруй хувьд цастай байгаагаас Алтай, Хангай, Хэнтэй, Хөвсгөлийн уулархаг нутаг, Тамсагийн хоолойгоор 11-22 см, говь, тал хээрийн зарим сумдын нутгаар 1-10 см зузаан цастай (1 дүгээр зураг) байна. 

Засгийн газрын 286 дугаар тогтоолын дагуу зудын байдалд үнэлгээ хийхэд Баян-Өлгийн Сагсай, Завханы Отгон, Баянхонгорын Баянбулаг, Галуутад цагаан зудын, Увсын Малчин, Тэс, Сагил, Улаангом, Давст, Завхан, Түргэн, Ховдын Алтай, Дарви, Үенч, Завханы Цэцэн-Уул, Цагаанчулуут, Баянхонгорын Жаргалант, Бөмбөгөр, Баянговь, Сэлэнгийн Сүхбаатар, Төвийн Угтаалцайдам, Хэнтийн Баян-Адрага, Дорнодын Хөлөнбуйр, Халхголд цагаанаар зудархуу (8 аймгийн 20 сум) байдалтай байна.

• Салхины хурд тал хээр болон говийн зарим нутгаар түр зуур 16-22 м/с буюу аюултай үзэгдлийн хэмжээнд хүрч салхилсан байна.
• Өнгөрсөн арав хоногт ихэнх нутгаар агаарын температур олон жилийн дунджийн орчим буюу түүнээс дулаан, баруун аймгуудын зарим сумдын нутгаар дунджаас хүйтэн, хур тунадас нутгийн 60 гаруй хувьд олон жилийн дунджийн орчим буюу түүнээс бага, 40 орчим хувьд дунджаас ахиу орсон байна.
• МАА-н үйлдвэрлэлд малд нэмэгдэл тэжээл өгөх, хужир шүү бэлтгэх, мал оторлуулах зэрэг ажлууд хийгдэж байна.