27 бөхөөс допингийн шинжилгээ авчээ

Монголын үндэсний допингийн эсрэг байгууллагаас явцын шинжилгээг өнгөрсөн арваннэгдүгээр сараас эхлүүлсэн. Тэд 2024 он дуустал 30 бөхөөс шинжилгээ авахаар төлөвлөсөн байна. Одоогоор допингийн явцын шинжилгээг 27 бөхөөс аваад байна. 

Явцын шинжилгээний талаар Допингийн эсрэг үндэсний байгууллагын  Гадаад харилцаа хамтын ажиллагааны газрын дарга н.Зүчи:  “Шинжилгээнд хамруулах бөхөө сонгохдоо Бөхийн өргөөнд зохион байгуулагдаж байгаа барилдаанд амжилттай барилдсан эсэхийг харах, санамсаргүй байдлаар сонгож байгаа. Шинжилгээ авсан өдрөө дээжийг нь Герман улсын лаборатори руу явуулдаг. Дээж ойролцоогоор долоон хоногийн хугацаанд Германд очиж байна. Ингээд 3-4 долоон хоногийн хугацаанд хариу гарна гэсэн үг. Өмнө нь үндэсний бөхийн тамирчдаас наадам, цагаан сараар шинжилгээ авдаг байсан бол явцын шинжилгээ авдаг боллоо.  Ирэх онд 150 бөхөөс допингийн явцын шинжилгээ авахаар төлөвлөжээ” гэсэн юм. 

Үндэсний бөхийн тамирчдаас 1999 оноос допингийн шинжилгээ авч эхэлсэн. Хамгийн анх 2002  онд А.Сүхбат аварга шинжилгээнд бүдэрч байсан бол сүүлд цэргийн арлан Г.Жамбалдорж, аймгийн арслан Г.Хишигбат, аймгийн арслан М.Буяндэлгэр нараас допингийн төрлийн бодис илэрч байсан юм.