Д.Амарбаясгалан: Өөрсдөө баталсан УИХ-ын тогтоолыг Үндсэн хууль зөрчсөн мэтээр ярих нь зохимжгүй

УИХ-ын нэгдсэн чуулганаар "Монгол Улсын 2025 оны төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь тавьсан Монгол Улсын Ерөнхийлөгчийн хориг"-ийг хэлэлцэж байна.

УИХ-ын дарга Д.Амарбаясгалан: "Төсвийн төслөө боловсруулж, өргөн барих хэлэлцүүлэгтэй холбоотойгоор Сангийн сайд байр сууриа илэрхийлэх нь зүйтэй. 8-р сард төсвийн тодотгол гэж орж ирж гишүүдийг баахан бухимдуулсан. Бөөн талцал болсон. Мэдээж гишүүд олон талаас хэлэлцэж, олонхиороо асуудлыг шийдээд явсан. 9-р сарын 1-нд дараачийн төсөв өргөн баригдсан. УИХ дээр ажлын хэсэг гарч, мэргэжлийн байнгын хороод дээр асуудлыг хэлэлцсэн. Гишүүдийн саналыг бүтээлчээр хүлээж аваад өнөөдөр нийгэмд үүсээд байгаа шүүмжлэлүүдийг засаж залруулах боломж хангалттай байсан боловч Засгийн газрын өргөн барьсан төслөөр нь дэмжих ёстой гэсэн улс төрийн намуудын бүлгүүдийн байр сууриуд гарсан учраас энэ асуудал өнөөдөр шийдэгдээд явчихсан.

Нэг ноцтой зүйл яригдаж байгаа. УИХ-ын авч хэрэгжүүлэх арга хэмжээтэй холбоотойгоор гарсан тогтоолыг Төсвийн байнгын хороо санаачилж оруулахдаа 2025 оны нэгдүгээр улиралд багтааж төсвийн тодотгол хөндөнө гэдэг төсөл оруулсан. Нэр бүхий гишүүд, асуудал хариуцсан сайд ондоо багтаж тодотгол хийе гэдэг санал гаргаж, хугацааг өөрчилсөн. Тэгээд өнөөдөр УИХ-ынхаа баталсан тогтоолыг өөрсдөө үндсэн хууль зөрчсөн мэтээр ярьж байгаа зохимжгүй зүйл гарч байна. Тиймээс өргөн барьж байгаа асуудал, хэлэлцэж байгаа асуудлууддаа эзэн болох гэдэг дээр тодорхой байр суурьтай байх ёстой." гэв.