Хятад иргэдийг барьцаалж, нэгийнх нь аминд хүрсэн хэрэг гарчээ

Бээжин-Улаанбаатар чиглэлийн нисэх онгоцоор "Чингис хаан" нисэх буудалд өчигдөр буусан, тэднийг тосож авсан хятад иргэдийг барьцаалж, нэгнийх нь амийг галт зэвсгээр хохироосон хэрэг гарчээ. БНХАУ-аас ирсэн хоёр иргэнийг Монголд түр оршин суудаг нутаг нэгтнүүд нь өчигдөр 14.00 цаг өнгөрч байхад нь тосож авчээ. Энэ үед 22, 23 настай хоёр залуу тэднийг барьцаалж, багагүй хэмжээний мөнгө нэхсэн байна. Энэ үед барьцаалагчид нэг Хятад иргэний аминд хүрчээ.

Хэрэг гарсан даруйд ТЦА-ны Иргэний агаарын тээврийн Цагдаагийн хэлтсийн ажилтнууд гэмт этгээдүүдийг саатуулж, хэргийн газрыг хамгаалалтад авсан бөгөөд өдгөө Мөрдөн байцаах албаны Хүнд гэмт хэрэг мөрдөн шалгах хэлтэст мөрдөн шалгах ажиллагаа явуулж байна. 

Уг хэргийн талаар Цагдаагийн ерөнхий газраас тодруулахад "Хятад улсын иргэдийг барьцаалж, нэгийнх нь аминд хүрсэн хэрэг гарсан талаар бид мэдээлсэн. Тэгвэл энэ талаар ЦЕГ-аас прокурорын зөвшөөрсөн хэмжээнд мэдээлэл өгсөн юм. Уг мэдээлэлд "Төв аймгийн Сэргэлэн сумын нутаг дэвсгэрт БНХАУ-ын 2 иргэнийг барьцаалж, ар гэрээс нь мөнгө нэхэн зодож, улмаар БНХАУ-ын 1 иргэний амь насыг хохироож, 1 хүний эрүүл мэндэд хохирол учруулсан хэрэгт БНХАУ-ын 2, Монгол Улсын 2 иргэнийг холбогдуулан шалгаж, цагдан хорих таслан сэргийлэх арга хэмжээ авч, мөрдөн шалгах ажиллагаа явуулж байна" гэжээ.