ХЗБХ: ШЕЗ-ийн шүүгч бус гишүүний албан тушаалд нэр дэвшигчийн томилгооны сонсголын товыг тогтоов

Улсын Их Хурлын Хууль зүйн байнгын хорооны өнөөдрийн (2024.11.19) хуралдаан 14 цаг 51 минутад гишүүдийн 59.1 хувийн ирцтэйгээр эхэлж, “Шүүхийн ерөнхий зөвлөлийн шүүгч бус гишүүний албан тушаалд нэр дэвшигчийн томилгооны сонсголын товыг тогтоох тухай” Байнгын хорооны тогтоолын төслийг хэлэлцэн баталлаа.

Тус Байнгын хорооны 2024 оны 10 дугаар сарын 22-ны өдрийн 05 дугаар тогтоолоор байгуулагдсан Шүүхийн ерөнхий зөвлөлийн шүүгч бус гишүүнийг сонгон шалгаруулах ажлын хэсэг хууль, журамд заасны дагуу ажилласан болохыг Д.Цогтбаатар дарга танилцууллаа. Ажлын хэсэг шийдвэр, тайлан, нэр дэвшигчийн холбогдох баримт бичгийг энэ сарын 18-ны өдөр Хууль зүйн байнгын хороонд хүргүүлсэн байна. Байнгын хороо хүсэлт, тайланг олон нийтэд мэдээлснээс хойш ажлын таван өдрийн дотор томилгооны сонсголын товыг тогтоож нийтэд мэдээлэх журамтай. Энэ дагуу дээрх төслийг хэлэлцэж байгаа хэмээн тэрбээр хуралдаанд танилцуулсан юм.

Байнгын хорооны тогтоолын төслийн талаар Улсын Их Хурлын гишүүн, ажлын хэсгийн ахлагч Ц.Сандаг-Очир танилцуулав. Монгол Улсын Шүүхийн тухай хуулийн 77 дугаар зүйлд заасны дагуу Шүүхийн ерөнхий зөвлөлийн шүүгч бус гишүүнийг Улсын Их Хурал нээлттэйгээр нэр дэвшүүлж, сонгон шалгаруулсны үндсэн дээр томилгооны сонсгол хийж томилох зохицуулалттай. Хууль зүйн байнгын хороо 2024 оны 10 дугаар сарын 02-ны өдөр хуралдаж Шүүхийн ерөнхий зөвлөлийн шүүгч бус гишүүнд нэр дэвшигчийг 2024 оны 10 дугаар сарын 02-ны өдрөөс 2024 оны 10 дугаар сарын 23-ны өдрийн хооронд бүртгэхээр тогтсон бөгөөд нэр дэвшигчээр С.Энхбаатар, М.Алтан-Очир нар материалаа ирүүлжээ.

Хууль зүйн байнгын хороо Шүүхийн ерөнхий зөвлөлийн шүүгч бус гишүүний сонгон шалгаруулах үүрэг бүхий ажлын хэсгийг 2024 оны 10 дугаар сарын 22-ны 05 дугаар тогтоолоор байгуулжээ. Тус ажлын хэсгийг Улсын Их Хурлын гишүүн Ц.Сандаг-Очир ахалж, бүрэлдэхүүнд холбогдох хуулийн дагуу Улсын Их Хурал дахь Монгол Ардын намын бүлгийн Ажлын албаны дэд дарга О.Бат-Эрдэнэ, Улсын Их Хурал дахь Ардчилсан намын бүлгийн Хүний эрх, эрх зүйн бодлогын зөвлөх Х.Номингэрэл, Ерөнхийлөгчийн Тамгын газрын Хуулийн бодлогын газрын дарга Ж.Мөнхболд, Засгийн газрын Хэрэг эрхлэх газрын дэд дарга Б.Батцэцэг, Хүний эрхийн Үндэсний Комиссын гишүүн С.Дондов, Монголын хуульчдын холбооны Зөвлөлийн гишүүн Ц.Мөнхбат, Монголын өмгөөлөгчдийн холбооны Удирдах зөвлөлийн гишүүн З.Сүхбаатар, Хууль зүйн үндэсний хүрээлэнгийн захирал Х.Эрдэм-Ундрах, Монгол Улсын их сургуулийн Хууль зүйн сургуулийн захирал Б.Амарсанаа, Отгонтэнгэр их сургуулийн ахлах багш С.Эрдэнэболор нар ажилласан байна.

Хууль зүйн байнгын хорооны 2021 оны 3 дугаар сарын 10-ны өдрийн 6 дугаар тогтоолоор баталсан Шүүхийн ерөнхий зөвлөлийн болон Шүүхийн сахилгын хорооны шүүгч бус гишүүнийг сонгон шалгуулах журмын дагуу сонгон шалгаруулалтын зарыг нийтэд мэдээлэх,  нэр дэвших тухай хүсэлт, материал хүлээн авах, ажлын хэсэг байгуулах, нэр дэвшигчдээ бүртгэж, нийтэд мэдээлэх, нэр дэвшигчийн баримт бичгийг parliament.mn цахим хуудаст байршуулах, нэр дэвшигчийн талаар мэдээлэл цуглуулах, бүрдүүлэх ажлын хэсгийн ярилцлага зохион байгуулах, нэр дэвшигчийг тодруулан Улсын Их Хуралд санал болгох гэсэн 8 үе шатны хүрээнд зохион байгуулж, саналаа танилцуулж байгаагаа Ц.Сандаг-Очир гишүүн хэлэв.

Шүүхийн ерөнхий зөвлөлийн шүүгч бус гишүүнд нэр дэвших хүсэлт, материалаа хоёр хүн ирүүлснийг сонгон шалгаруулалтад оролцуулж, ажлын хэсгийн гишүүдийн олонхын санал авсан нэр дэвшигчдийг танилцуулав. Санал хураалтад ажлын хэсгийн 9 гишүүн оролцсон бөгөөд Шүүхийн ерөнхий зөвлөлийн шүүгч бус гишүүнд нэр дэвшигч С.Энхбаатар 8 санал, М.Алтан-Очир 1 санал авсан байна. Иймд холбогдох журамд заасны дагуу нэр дэвшигчидтэй хийх томилгооны сонсголын товыг тогтоохоор Байнгын хорооны төслийг боловсруулжээ.

Ажлын хэсгийн ахлагчийн танилцуулсан дээрх танилцуулгатай холбогдуулан Шүүхийн ерөнхий зөвлөлийн бие даасан, хараат бус үйл ажиллагаа явуулах нөхцөлийг бүрдүүлэх үүднээс сонсголыг шуурхай зохион байгуулах талаар Улсын Их Хурлын гишүүн П.Сайнзориг үг хэлсэн бол Улсын Их Хурлын гишүүн Д.Ганбат сонгон шалгаруулалтын цар хүрээний талаар тодруулж, хариулт авсан. Төсөлтэй холбогдуулан Улсын Их Хурлын гишүүн Х.Тэмүүжин, Ж.Алдаржавхлан, Д.Ганбат нар үг хэлж, байр сууриа илэрхийлсэн юм.

Ийнхүү санал хураалт явуулахад Байнгын хорооны хуралдаан оролцсон гишүүдийн олонх буюу 60 хувь нь дэмжиж, “Шүүхийн ерөнхий зөвлөлийн шүүгч бус гишүүний албан тушаалд нэр дэвшигчийн томилгооны сонсголын товыг тогтоох тухай” Байнгын хорооны тогтоолын төслийг батлав. Энэ дагуу Шүүхийн ерөнхий зөвлөлийн шүүгч бус гишүүний албан тушаалд нэр дэвшигчийн томилгооны сонсголыг 2024 оны 12 дугаар сарын 06-ны өдөр зохион байгуулахаар тогтлоо. Үүгээр хуралдаан өндөрлөв гэж Улсын Их Хурлын Хэвлэл мэдээлийн газраас мэдээлэв.