ХӨСҮТ: Амны хаалт зүүх нь халдвараас хамгаалах найдвартай арга

ХӨСҮТ-өөс өнөөдөр томуу, томуу төст өвчний нөхцөл байдлын талаар мэдээлэл хийлээ.

Нийслэлийн хэмжээнд дүүргийн эрүүл мэндийн төвүүдэд 1200 үзлэг хийгдсэнээс 7.8 хувь буюу 9200 тохиолдол нь томуу, томуу төст өвчин эзэлж байна. Насны байдлаар авч үзвэл дээрх өвчний халдвар авсан 0-15 насныхан 86 хувийг эзэлж байна. Тэр дундаа 0-1 насны хүүхэд 21.2 хувь, 2-4 насныхан 23.5 хувь, 5-9 насныхан 19.5 хувь, 10-15 насныхан 23.2 хувийг эзэлжээ.

Түргэн тусламжаар нийт 10,900 дуудлага ирснээс 13.9 хувийг томуу томуу төст өвчин эзэлж байна.

Мөн нийслэлийн есөн дүүргийн эрүүл мэндийн төв, нэгдсэн эмнэлгүүдэд арванхоёрдугаар сарын 2-ны байдлаар нийтдээ 1311 хүүхэд хэвтэн эмчлүүүлж байна. Тэдний 87 хувь нь томуу, томуу төст өвчний халдвар авснаас эмнэлэгт хэвтжээ. Нийт 572 ор байдаг ч хэвтэн эмчлүүлэгсэд нэмэгдсэн тул  532 ор нэмэлтээр дэлгэжээ. Мөн нийслэлийн хэмжээнд эмнэлгүүдэд 1284 эмч, сувилагч ажиллаж байгаа гэлээ. 

Төрөлжсөн үйлчилгээтэй эрүүл мэндийн байгууллагад ор дэлгэсэн. Нийт 1814 ор дээр нэмж 3122 ор дэлгэсэн тул хүүхэд хэвтэн эмчлүүлэх бэлэн байдал хангагджээ.

Нийслэлийн хэмжээнд томуу, томуу төст өвчний тохиолдол нэмэгдэж байгаа бөгөөд “А” хүрээний вирус тархах болсныг анхаарууллаа. Томуу, томуу төст өвчин нь вирусын гаралтай, ханиаж найтаахад тархдаг. Нэг хүн найтаахад 40 мянга гаруй вирусын дусал тархдаг. Вирусын дусал нь 7 метрийн зайнд халдвар тараах эрсдэлтэй байдаг тул амны хаалт зүүх нь энэ төрлийн өвчлөлөөс өөрийгөө болон бусдыг хамгаалах найдвартай арга хэрэгсэл болохыг санууллаа.